शिवसेना पुन्हा सत्तेपासून दूर रहाणार ?

मोफत मराठी बातम्यांसाठी आमचा ग्रुप जॉईन करा
WhatsApp Group Join Now
Telegram Group Join Now

अहमदनगर :- शिवसेनेला सत्तेपासून दूर ठेवण्यासाठी महापौर निवडणुकीत भाजपला राष्ट्रवादीच्या बडतर्फ नगरसेवकांनी पाठिंबा दिला होता.

आता, पुन्हा तीच खेळी स्थायी समिती सभापती निवडणुकीत खेळण्याच्या हालचाली आहेत. या निवडणुकीत जर भाजप-शिवसेना युतीचा निर्णय झाला तर बडतर्फ गट कॉंग्रेसच्या पाठिंब्यावर निवडणुकीत उतरून वेळप्रसंगी भाजपचा पाठिंबा घेणार असल्याचे समजते.

स्थायी समिती सभापती तसेच महिला-बालकल्याण समिती सभापती व उपसभापतीपदाच्या निवडीसाठी मनपा प्रशासनाकडून नाशिक विभागीय आयुक्तांना सोमवारी प्रस्ताव सादर झाला आहे.

विभागीय आयुक्तांकडून तारीख आल्यानंतर या निवडी होणार आहेत. स्थायी समितीत शिवसेनेचे सर्वाधिक 6 सदस्य असून राष्ट्रवादी बडतर्फ 5, भाजप 3 तर कॉंग्रेस व बसपचा प्रत्येकी एक सदस्य आहे.

बहुमतासाठी 9 सदस्यांची आवश्यकता आहे. महापौर निवडणुकीत भाजपला साथ दिल्याने भाजपने बसपला स्थायी समिती सभापतीपदाचा शब्द दिलेला आहे.

मनपात अद्याप शिवसेना- भाजप युतीचा निर्णय झालेला नाही. युती झाल्यास सभापतीपद शिवसेनेकडे येऊ शकते. युतीचा निर्णय झाल्यास राष्ट्रवादीचे बडतर्फ नगरसेवक सभापतीपदाच्या निवडणुकीत उतरणार असल्याचे सांगण्यात येते.

या गटाचे 5 संख्याबळ असून कॉंग्रेस 1 व भाजपच्या 3 सदस्यांचा पाठिंबा घेण्यात येणार असल्याचे या गटाच्या गोटातून सांगण्यात येत आहे.

भाजपचे हे तीन सदस्य पूर्वी राष्ट्रवादीत होते. ते आ. जगताप समर्थक मानले जात असत, असेही सांगितले जात आहे.

Leave a Comment