अहमदनगर :- महापालिकेच्या पोटनिवडणूक निकालाचा दुहेरी फटका शिवसेनेला बसला आहे. निवडणुकीत हार पत्करावी लागल्याने आपल्याकडे असलेली जागा गमवावी लागलीच व आता महापालिका स्थायी समिती तसेच महिला व बालकल्याण समितीतील प्रतिनिधित्वही प्रत्येकी एका सदस्याने कमी झाले आहे.
महापालिका स्थायी समिती आणि महिला व बालकल्याण समितीमध्ये प्रत्येकी १६ सदस्य असतात. महापालिकेचे ६८ नगरसेवक असल्याने या सदस्य संख्येने नगरसेवक संख्येला भागाकार केल्यावर प्रत्येक सदस्याचे मूल्य ४.२५ होते. या मूल्याने पक्षीय नगरसेवक संख्येला भागाकार केल्यावर त्या-त्या पक्षांची दोन्ही समित्यांतील नगरसेवक प्रतिनिधित्व संख्या निश्चित होते.
वर्षभरापूर्वी झालेल्या महापालिकेच्या सार्वत्रिक निवडणुकीत शिवसेना नगरसेवकांची संख्या २४ होती. तर राष्ट्रवादीची १९, भाजपची १४, काँग्रेसची ५, बहुजन समाज पक्षाची ४, समाजवादी पक्षाची १ व अपक्ष १ अशी अन्य संख्या होती.
त्या वेळी पक्षनिहाय सदस्य मूल्य शिवसेनेचे ५.६४, राष्ट्रवादीचे ४.४७, भाजपचे ३.२९, काँग्रेसचे १.१७, बहुजन समाज पक्षाचे ०.९४, समाजवादी पक्षाचे ०.२३ व अपक्षाचे ०.२३ होते. यानुसार पहिल्या फेरीत पूर्णांकानुसार सेनेचे ५, राष्ट्रवादीचे ४, भाजपचे ३ व काँग्रेसचा १ असे १३ नगरसेवक प्रतिनिधी स्थायी समिती आणि महिला व बालकल्याण समितीसाठी निश्चित झाले.
राहिलेल्या ३ प्रतिनिधींसाठी सर्वाधिक अपूर्णांकानुसार नियुक्ती झाली. यात बहुजन समाज पक्षाला, शिवसेनेला व राष्ट्रवादीला लाभ झाला व उर्वरित तीन सदस्य या पक्षांचे निवडले गेले. यामुळे शिवसेनेला ६, राष्ट्रवादीला ५, भाजपला ३ आणि काँग्रेस व बहुजन समाज पक्षाला प्रत्येकी १ सदस्यत्व मिळाले होते.
पोटनिवडणुकीत शिवसेना उमेदवार अनिता दळवी यांचा पराभव झाल्याने आता महापालिकेतील शिवसेनेची नगरसेवक संख्या २३ झाली आहे. तर भाजपच्या पल्लवी जाधव यांचा विजय झाल्याने त्यांची नगरसेवक संख्या १५ झाली आहे.
सदस्य मूल्यानुसार आता शिवसेनेचे पक्षनिहाय सदस्य मूल्य ५.४१ व भाजपचे ३.५२ झाले आहे. एक जागा गमवावी लागल्याने शिवसेनेचे वर्षभरापूर्वी असलेले मूल्यांकन तब्बल ०.२३ ने कमी झाले व एक जागा वाढल्याने भाजपचे तेवढेच वाढले आहे.
जास्त अपूर्णांकांमुळे वर्षभरापूर्वी शिवसेनेला स्थायी व महिला-बालकल्याण समितीत प्रत्येकी एक जास्त नगरसेवक पाठवणे शक्य झाले होते. पण आता भाजपचे अपूर्णांक शिवसेनेच्या अपूर्णांकापेक्षा ०.११ मूल्याने जास्त असल्याने शिवसेनेचा दोन्ही समित्यांतील प्रत्येकी एक प्रतिनिधी कमी होऊन भाजपचा वाढणार आहे.
This Story First Publish on Ahmednagarlive24.com®
No1 News Network Of Ahmednagar™
जगभरातील लाखो वाचक असलेले अहमदनगर जिल्ह्यातील सर्वाधिक लोकप्रिय व विश्वासार्ह न्यूज पोर्टल www.wordpress-1209733-4285786.cloudwaysapps.com