Sacheerome IPO GMP:- आज शेअर बाजारात एक विशिष्ट आयपीओ गुंतवणूकदारांचं लक्ष वेधून घेत आहे व तो म्हणजे साचेरोम कंपनीचा. आज म्हणजे ११ जून हा या आयपीओत बोली लावण्याचा शेवटचा दिवस असून, अवघ्या दोन दिवसांतच त्याला गुंतवणूकदारांकडून जबरदस्त प्रतिसाद मिळालाय. सबस्क्रिप्शन तब्बल ६५ पट झालं असून, ग्रे मार्केटमध्येही त्याचा दर वधारलेला दिसतोय. त्यामुळे अनेक लहान गुंतवणूकदारांची नजर आज या शेवटच्या संधीवर खिळून आहे.
ग्रे मार्केटमधील स्थिती काय?
ग्रे मार्केट प्रीमियम, म्हणजेच GMP, साचेरोमच्या बाबतीत सध्या ४५ रुपयांवर आहे. म्हणजेच, बाजारात शेअर विक्रीपूर्वीच त्याची प्रत्यक्ष विक्री किंमतीपेक्षा सुमारे ४४ टक्के अधिक किंमत मिळतेय. कालच GMP ३० रुपये होता, तर आज तो थेट ४५ रुपयांवर गेला आहे. ही वाढ साचेरोमच्या आयपीओबाबत बाजारात असलेल्या सकारात्मक अपेक्षांचेच द्योतक आहे.
या आयपीओची किंमत किती?
या आयपीओची किंमत ९६ ते १०२ रुपये प्रति शेअर इतकी ठेवण्यात आली असून, एकूण मूल्य ६१.६२ कोटी रुपये आहे. यामध्ये जवळपास ६० लाख नवीन शेअर्स बाजारात येणार आहेत. किरकोळ गुंतवणूकदाराला किमान १,२०० शेअर्ससाठी अर्ज करावा लागतो, त्यामुळे सुरुवातीचा गुंतवणूक खर्च सुमारे १.२२ लाख रुपये आहे. बऱ्याच जणांसाठी ही गुंतवणूक मोठी असली, तरी GMP पाहता काहीजण त्यात उडी मारण्याचा विचार करत आहेत.
कधी होणार या शेअर्सचं वाटप?
या शेअर्सचं वाटप १२ जून रोजी होण्याची शक्यता आहे. त्यानंतर १६ जून रोजी NSE च्या SME प्लॅटफॉर्मवर साचेरोमची लिस्टिंग होईल. जीवायआर कॅपिटल अ‍ॅडव्हायझर्स या कंपनीने आयपीओ व्यवस्थापनाची जबाबदारी घेतली असून, लिंक इनटाइमकडे शेअर्स वाटपाचं काम आहे.
या कंपनीचा व्यवसाय काय?
कंपनीचा व्यवसाय काय आहे, हेही पाहणं महत्त्वाचं ठरतं. साचेरोम ही १९९२ साली स्थापन झालेली कंपनी आहे. ती सुगंध आणि चव निर्मितीमध्ये कार्यरत असून, अन्नपदार्थ, घरगुती वापर, वैयक्तिक सौंदर्य, एअर फ्रेशनर्स, पुरुषांचे ग्रूमिंग आणि पाळीव प्राण्यांच्या काळजीसाठी लागणारे घटक तयार करते. भारतातच नाही, तर यूएई आणि आफ्रिकेतही ती आपली उत्पादने निर्यात करते.
कंपनीची आर्थिक कामगिरीही लक्षवेधी आहे. २०२५ या आर्थिक वर्षात तिने १०८ कोटी रुपयांचा महसूल आणि १५.९८ कोटी रुपयांचा निव्वळ नफा नोंदवला. तसेच मागच्या वर्षीच्या तुलनेत जवळपास ५० टक्क्यांनी वाढलेलं हे चित्र गुंतवणूकदारांसाठी दिलासादायक आहे.
या आयपीओतून मिळणारे पैसे कंपनी उत्तर प्रदेशातील गौतम बुद्ध नगर येथे नवीन उत्पादन युनिट उभारण्यासाठी वापरणार आहे. त्याचबरोबर काही रक्कम सामान्य खर्चांसाठी राखून ठेवण्यात आली आहे. साचेरोमच्या म्हणण्यानुसार, त्यांच्याकडे अनुभवी व्यवस्थापन, संशोधनक्षमता आणि मजबूत पुरवठा साखळी आहे. त्यामुळे आगामी काळात या क्षेत्रात आपलं वेगळं स्थान निर्माण करण्याचं त्यांचं उद्दिष्ट आहे.
