New Income Tax Rule 2025 : नव्या आर्थिक वर्षाच्या सुरुवातीस केंद्र सरकारने करदात्यांसाठी मोठा दिलासा दिला आहे. केंद्रीय अर्थसंकल्प 2025 मध्ये सरकारने नवीन करप्रणालीत मोठे बदल केले असून, आता 12 लाख रुपयांपर्यंतच्या वार्षिक उत्पन्नावर कोणताही कर लागणार नाही. यापूर्वी ही मर्यादा 7 लाख रुपये होती.
या निर्णयामुळे मध्यमवर्गीयांना मोठा फायदा होणार आहे. तथापि, करमुक्त उत्पन्न असले तरी इनकम टॅक्स रिटर्न (ITR) भरावा लागेल का? हा प्रश्न अनेक करदात्यांच्या मनात आहे. सरकारने याबाबत स्पष्टता दिली असून, ITR फाइल करणे अनिवार्य असेल, जरी तुमचे वार्षिक उत्पन्न 12 लाख रुपयांच्या आत असेल.
ITR भरावा लागणार का?
सरकारच्या नव्या निर्णयानुसार, 12 लाख रुपयांपर्यंत उत्पन्नावर कर नाही, पण त्या करसवलतीचा लाभ घेण्यासाठी करदात्यांनी ITR फाइल करणे बंधनकारक असेल. यामुळे करदात्यांची आर्थिक स्थिती स्पष्ट राहील आणि भविष्यात कोणत्याही अडचणी येणार नाहीत.
ITR भरणे का गरजेचे आहे?
तज्ज्ञांच्या मते, जरी कोणत्याही व्यक्तीचे उत्पन्न करमुक्त असेल, तरीही ITR फाइल करणे फायदेशीर ठरू शकते. यामुळे सरकारला करदात्यांची आर्थिक माहिती मिळते तसेच भविष्यात बँक कर्ज, व्हिसा प्रोसेस आणि इतर वित्तीय व्यवहारांसाठी ITR आवश्यक ठरू शकतो.
असे असेल तर ITR भरावा लागेल
1. बँक खात्यात 1 कोटी रुपये किंवा त्याहून अधिक रक्कम जमा केली असेल.
2. वार्षिक वीजबिलाचा खर्च 1 लाख रुपये किंवा त्याहून अधिक असेल.
3. कोणत्याही परदेशी प्रवासासाठी 2 लाखांहून अधिक खर्च केला असेल.
वयोमर्यादेनुसार ITR भरण्याचे नियम:
60 वर्षांखालील व्यक्तींसाठी – ITR भरण्याची मर्यादा 2.5 लाख रुपये उत्पन्न
60 ते 79 वर्षे (ज्येष्ठ नागरिक) – ITR भरण्याची मर्यादा 3 लाख रुपये उत्पन्न
80 वर्षांवरील (अति-ज्येष्ठ नागरिक) – ITR भरण्याची मर्यादा 5 लाख रुपये उत्पन्न
नवीन कर प्रणालीनुसार ही मर्यादा 4 लाख रुपये करण्यात आली आहे.
सरकारचा उद्देश काय
सरकारने नवीन कर नियमांद्वारे करदात्यांना सवलती देत त्यांची प्रक्रिया सुलभ करण्याचा प्रयत्न केला आहे. ITR भरणे बंधनकारक असले तरी, यामुळे वित्तीय व्यवहार अधिक पारदर्शक होतील आणि भविष्यात कोणत्याही कायदेशीर गुंत्यात अडथळे येणार नाहीत.
नव्या नियमांनुसार 12 लाख रुपयांपर्यंतचे उत्पन्न करमुक्त असले, तरी त्याचा लाभ घेण्यासाठी ITR फाइल करणे अनिवार्य असेल. तसेच, मोठ्या आर्थिक व्यवहारांमध्ये सहभागी असणाऱ्या नागरिकांसाठीही ITR भरणे आवश्यक राहणार आहे. त्यामुळे प्रत्येक करदात्याने आपली आर्थिक स्थिती लक्षात घेऊन ITR फाइल करण्यास प्राधान्य द्यावे, असे तज्ज्ञांचे मत आहे.
