Ahilyanagar News: कर्जत- तालुक्यातील निमगाव डाकू येथे पुण्यश्लोक अहिल्यादेवी होळकर सहकारी सूतगिरणी प्रकल्प उभारण्यात येणार आहे. या महत्त्वाकांक्षी प्रकल्पासाठी शासनाने १८२०.२५ लाख रुपयांचे भांडवल मंजूर केले आहे. विधानपरिषदेचे सभापती प्रा. राम शिंदे यांनी ही माहिती पत्रकारांना देताना सांगितले की, हा प्रकल्प स्थानिक शेतकऱ्यांना आर्थिक आधार देण्यासोबतच परिसरातील युवकांना रोजगाराच्या नवीन संधी उपलब्ध करेल.
चोंडी परिसराला उद्योगाची कर्मभूमी बनवण्याच्या दिशेने हा प्रकल्प एक मोठे पाऊल ठरणार आहे. सूतगिरणीमुळे कापूस उत्पादकांना चांगला भाव मिळेल आणि स्थानिक अर्थव्यवस्थेला चालना मिळेल, असा विश्वास त्यांनी व्यक्त केला.
सुतगिरणीला शासनाची मंजुरी
या सूतगिरणी प्रकल्पासाठी निमगाव डाकू येथील गट नंबर २६ आणि २९ मधील ४ हेक्टर म्हणजेच ९.८४ एकर जागा निश्चित करण्यात आली आहे. या जागेच्या खरेदीसाठी शासनाने ११ फेब्रुवारी २०२५ रोजी मान्यता दिली. प्रकल्पाला तांत्रिक मंजुरी मिळाली असून, १९४०.६८ लाख रुपये (जीएसटी वगळून) खर्चाला मंजुरी देण्यात आली आहे.
तसेच, बांधकामासाठी १८६४.०३ लाख रुपयांची निविदा प्रारूप (जीएसटीसह) १५ एप्रिल २०२५ रोजी सादर करण्यात आली आहे. या प्रकल्पाचे नियोजन आणि अंमलबजावणी व्यवस्थित व्हावी यासाठी सेवानिवृत्त अभियंता धर्मेंद्र वर्मा यांची तात्पुरती नियुक्ती करण्यात आली आहे. लवकरच बांधकामाला सुरुवात होणार असून, हा प्रकल्प वेळेत पूर्ण करण्यावर प्रशासनाचा भर आहे.
तरूणांना रोजगाराच्या संधी
या सूतगिरणीमुळे स्थानिक तरुणांना रोजगाराच्या संधी उपलब्ध होतील. प्रकल्पात २०० कामगार आणि ३० कार्यालयीन कर्मचारी अशी एकूण २३० पदे भरण्यात येणार आहेत. सूतगिरणीसाठी दररोज ८० कापूस गाठी लागणार असून, वर्षभरात सुमारे ३० हजार कापूस गाठींची गरज भासेल. यामुळे स्थानिक शेतकऱ्यांनी उत्पादित केलेला कापूस थेट या सूतगिरणीत वापरला जाईल. परिणामी, शेतकऱ्यांना त्यांच्या कापसाला चांगला भाव मिळेल आणि मध्यस्थांचा हस्तक्षेप कमी होईल. याशिवाय, कापसाच्या लागवडीला प्रोत्साहन मिळेल आणि कापूस विक्रीसाठी स्थानिक बाजारपेठ विकसित होईल.
सभापती राम शिंदेचा पुढाकार
या प्रकल्पामुळे निमगाव डाकू आणि चोंडी परिसरात उद्योगधंद्यांना चालना मिळेल. सूतगिरणीच्या जोडीला जिनिंग आणि प्रेसिंग फॅक्टरी, सूत आणि कापूस व्यापार यासारख्या पूरक व्यवसायांना संधी मिळेल. यामुळे स्थानिक अर्थव्यवस्थेला बळकटी येईल आणि परिसरातील तरुणांना गावातच रोजगार मिळाल्याने स्थलांतराचा प्रश्नही कमी होईल. प्रा. शिंदे यांनी सांगितले की, हा प्रकल्प पुण्यश्लोक अहिल्यादेवींच्या जन्मभूमीला उद्योगाची कर्मभूमी बनवण्याच्या दृष्टीने महत्त्वाचा आहे. चोंडीचा नावलौकिक वाढवण्यासाठी हा प्रकल्प एक मैलाचा दगड ठरेल, असा विश्वास त्यांनी व्यक्त केला.
प्रा. शिंदे यांनी या प्रकल्पाच्या यशस्वीतेचा पाया शासनाचा संकल्प आणि स्थानिकांचा सहभाग असल्याचे नमूद केले. शेतकरी, स्थानिक नेते आणि प्रशासन यांच्या समन्वयातून हा प्रकल्प यशस्वी होईल, अशी आशा त्यांनी व्यक्त केली.
