Pune Metro News : पुणेकरांसाठी वाहतूक कोंडी ही रोजची डोकेदुखी. विशेषतः आयटी क्षेत्रात काम करणाऱ्यांना आणि शहराच्या मध्यवर्ती भागात येणाऱ्यांना दररोजच्या प्रवासात प्रचंड वेळ आणि उर्जा खर्च करावी लागते. या समस्येवर उपाय म्हणून सुरू झालेला माण-हिंजवडी ते शिवाजीनगर मेट्रो प्रकल्प आता अंतिम टप्प्यात आहे. मात्र, काही तांत्रिक व प्रशासकीय अडचणींमुळे प्रत्यक्ष प्रवासी सेवा सुरू होण्यास थोडा अधिक वेळ लागणार आहे.
पुणे महानगर प्रदेश विकास प्राधिकरणाच्या (PMRDA) अधिकाऱ्यांनी दिलेल्या माहितीनुसार, एकूण 23.3 किमी लांबीच्या या मेट्रो प्रकल्पाचे 85 टक्क्यांहून अधिक काम पूर्ण झाले आहे. पुलांचे बांधकाम पूर्ण झाले असून अनेक ठिकाणी रूळ टाकण्याचे कामही अंतिम टप्प्यात आहे. तरीसुद्धा, प्रवाशांना मेट्रोसेवेचा लाभ घेण्यासाठी 2026 साल उजाडेपर्यंत वाट पाहावी लागणार आहे.
मार्च 2026: प्रत्यक्ष सेवा
मेट्रोच्या चाचणी धावांसाठी PMRDA ने सप्टेंबर 2025 हे उद्दिष्ट ठेवले आहे. त्या आधी स्थानकांवरील सुविधा पूर्ण करणे, सुरक्षा चाचण्या आणि तांत्रिक त्रुटी दूर करणे हे प्राथमिक उद्दिष्ट राहणार आहे. प्रवासी सेवेला मात्र मार्च 2026 पासून प्रारंभ होईल, असा अंदाज वर्तवण्यात आला आहे.
सुविधांनी परिपूर्ण 23 स्थानके
या मेट्रो मार्गावर एकूण 23 स्थानकांची आखणी करण्यात आली आहे. क्वाड्रन, इन्फोसिस फेज 2, डोहलर, विप्रो, पल इंडिया, शिवाजी चौक, हिंजवडी, वाकड चौक, बालेवाडी स्टेडियम, एनआयसीएमएआर, रामनगर, लक्ष्मीनगर, बालेवाडी फाटा, बाणेर गाव, बाणेर, भारतीय कृषी संशोधन संस्था, सकाळनगर, सावित्रीबाई फुले पुणे विद्यापीठ, रिझर्व्ह बँक ऑफ इंडिया, कृषी महाविद्यालय, शिवाजीनगर आणि दिवाणी न्यायालय ही स्थानके या मार्गावर असणार आहेत. या पैकी 11 स्थानकांवर सरकते जिने, प्रतीक्षालये, आरामदायक आसनव्यवस्था, व्यापारी संकुल व वाहनतळ यांसारख्या आधुनिक सोयी दिल्या जाणार आहेत.
PPP तत्त्वावर प्रकल्प, पण अडथळे कायम
हा प्रकल्प सार्वजनिक-खासगी भागीदारी (PPP) तत्त्वावर उभारण्यात येत आहे, ज्यामुळे खासगी गुंतवणूकदारांचा सहभागही आहे. मात्र, भूसंपादन, शासकीय परवानग्या आणि पर्यावरणीय मंजुरी यांसारख्या बाबींमुळे प्रकल्पास वेळोवेळी विलंब होत आहे.
वाहतूक कोंडीवर रामबाण उपाय, पण अजून थोडा धीर लागणार
ही मेट्रोसेवा सुरू झाल्यानंतर पुण्यातील वाहतूक कोंडीमध्ये लक्षणीय घट होईल, अशी अपेक्षा आहे. हिंजवडीसारख्या आयटी हबपासून थेट शिवाजीनगरच्या न्यायालय व विद्यापीठ भागापर्यंतचा प्रवास अधिक जलद आणि आरामदायक होणार आहे. मात्र, हा बदल अनुभवण्यासाठी पुणेकरांना अजून सुमारे 11 महिने प्रतीक्षा करावी लागणार आहे.
