शनि देवाशी संबंधित नीलम कधी, कसा आणि कुणी घालावा? जाणून घ्या सर्व नियम!

राशी आणि ग्रह यांचे मानवी जीवनावर पडणारे परिणाम हे भारतीय ज्योतिषशास्त्रात फार पूर्वीपासून मान्य आहेत. त्यात शनी ग्रहाचं स्थान विशेष महत्त्वाचं मानलं जातं कारण शनीची कृपा लाभल्यास जीवनात यश, प्रतिष्ठा, आर्थिक स्थैर्य येतं, तर शनी रुष्ट झाल्यास संकटांचा सामना करावा लागतो. म्हणूनच, शनीची कृपा मिळवण्यासाठी नीलम रत्न धारण करण्याची परंपरा खूप जुनी आहे. पण हे रत्न इतकं प्रभावशाली आहे की ते घालण्याआधी विशेष काळजी घेतली पाहिजे, अन्यथा फायदे होण्याऐवजी नुकसानही होऊ शकतं.

नीलम, ज्याला इंग्रजीत ब्लू सफायर म्हणतात, शनी ग्रहाचं प्रतिनिधित्व करतो. याला रत्नशास्त्रात खूप बलशाली मानलं जातं. नीलम घालण्याचा उद्देश म्हणजे शनी ग्रहाशी सुसंवाद साधणं, त्यांचा राग शांत करणं आणि जीवनात स्थैर्य मिळवणं. पण प्रत्येकालाच नीलम शोभत नाही, कारण प्रत्येकाच्या कुंडलीतील ग्रहांची स्थिती वेगळी असते. त्यामुळे नीलम घालण्याचा निर्णय तुमच्या ज्योतिषानं तपासलेल्या ग्रहस्थितीनुसारच घ्यावा.

जर ज्योतिषाच्या सल्ल्यानं तुम्ही नीलम घालण्याचा निर्णय घेतला असेल, तर यासाठी विशिष्ट पद्धत पाळणं गरजेचं आहे. नीलम रत्न धारण करण्यापूर्वी ते गंगाजल आणि कच्च्या दूधात ठेवून शुद्ध केलं जातं. नंतर शनिदेवाची मनापासून पूजा करून ते शनिवारी धारण केलं जातं. हे रत्न मधल्या बोटात, विशेषतः पंचधातूच्या अंगठीत घातलं जातं. त्याचं वजन सामान्यतः 7 ते 8.25 रत्ती दरम्यान असावं.

रत्न धारण करण्यापूर्वीचे नियम

पण नीलम तुमच्यासाठी फायदेशीर ठरेल का, हे अजमावण्याचीही एक पारंपरिक पद्धत आहे. रत्न धारण करण्याआधी, निळ्या कपड्यात बांधून ते रात्रभर उशीखाली ठेवावं. जर चांगली स्वप्नं पडली आणि झोप शांत झाली, तर नीलम तुम्हाला शोभेल असं मानलं जातं. नंतरच ते प्रत्यक्षात अंगात घालावं.

नीलममुळे अनेकांना अचानक आर्थिक लाभ झाल्याचं पाहायला मिळालं आहे. करिअरमध्ये स्थिरता, व्यवसायात वाढ, आरोग्य सुधारणा अशी अनेक फायदे नीलमच्या सहाय्यानं अनुभवले गेले आहेत. विशेषतः मकर आणि कुंभ राशीच्या लोकांना हे रत्न लाभदायक ठरू शकतं, कारण शनी हेच राशीस्वामी आहेत.

नीलम रत्नाचे दुष्परिणाम

मात्र, नीलम रत्नाच्या दुष्परिणामांची शक्यताही नाकारता येत नाही. चुकीच्या वेळेस किंवा योग्य ज्योतिष सल्ल्याविना घातल्यास नीलममुळे अचानक अपघात, आर्थिक नुकसान, कुटुंबातील कलह किंवा मानसिक अस्थैर्य निर्माण होऊ शकतं. शिवाय नीलमसोबत काही रत्ने घालणं टाळावं लागतं. उदा. पोवळे, माणिक किंवा मोती. यामुळे ग्रहांमध्ये विसंवाद होण्याची शक्यता असते.

या साऱ्या बाबी लक्षात घेता, नीलम हे रत्न खरोखरच लाभदायक ठरू शकतं पण केवळ योग्य मार्गदर्शनाखाली आणि श्रद्धेने धारण केल्यासच. अन्यथा, एक चुकीचा निर्णय तुमच्या आयुष्यात अनपेक्षित अडथळे निर्माण करू शकतो.