घराच्या सजावटीमागे फक्त सौंदर्यदृष्टी नसते, तर त्यामागे आपल्या जीवनावर प्रभाव टाकणारी अनेक आध्यात्मिक आणि ऊर्जात्मक गणितं दडलेली असतात. भारतीय वास्तुशास्त्रात काही विशिष्ट चित्रं आणि वस्तू अत्यंत शुभ मानल्या जातात, त्यापैकी एक म्हणजे सात धावणाऱ्या घोड्यांचं चित्र. पण नेमकं का लावतात हे चित्र? आणि ते कुठे, कसं लावायला हवं, हे जाणून घेणं महत्त्वाचं आहे.
सात घोडे हे फक्त एका चित्रातले प्राणी नाहीत, तर ते गती, यश, धैर्य आणि समृद्धीचं प्रतिक आहेत. त्यांच्या संख्येचंही एक खास महत्त्व आहे. “सात” हा अंक सूर्याच्या सात अश्वांना दर्शवतो आणि त्यामुळे हे चित्र दिव्य ऊर्जा आणि प्रगतीचं प्रतीक मानलं जातं. जेव्हा एखाद्या घरात किंवा ऑफिसमध्ये हे चित्र योग्य पद्धतीने लावलं जातं, तेव्हा ते त्या ठिकाणी सकारात्मकता, कामात स्थिरता आणि मानसिक ऊर्जा निर्माण करतं.
कोणत्या दिशेला लावाल चित्र?
या चित्राचा सर्वात प्रभावी उपयोग त्याच्या दिशेनुसार ठरतो. उदाहरणार्थ, जर हे चित्र घराच्या दक्षिण दिशेला लावलं, तर तुमच्या कीर्ती आणि समाजातील प्रतिष्ठेत वाढ होते. कारण दक्षिण दिशा ही यश आणि प्रसिद्धीची दिशा मानली जाते. तसेच, उत्तर दिशेला लावल्यास, जे कुबेराची दिशा मानली जाते, तुमच्या आर्थिक स्थितीत स्थिरता आणि वृद्धी होते. तुम्ही जर व्यवसायिक असाल तर हे चित्र दुकानात किंवा ऑफिसमध्ये लावणं फार फायदेशीर ठरू शकतं.
पूर्व दिशेला जर हे चित्र लावलं, तर तुम्हाला करिअरमध्ये गती मिळते. कारण ही दिशा सूर्याशी संबंधित आहे आणि ती नवीन संधी, प्रगती आणि अडकलेली कामं पुन्हा सुरू होण्यासाठी पोषक ठरते. मात्र, या चित्रात सर्व घोडे पूर्णपणे स्पष्टपणे दिसले पाहिजेत. कोणताही घोडा अधूरा किंवा आडवलेला नको.
हे चित्र कुठेही लावणं योग्य नाही. वास्तुशास्त्र सांगतं की सात घोड्यांचं चित्र घराच्या बैठक खोलीत, अभ्यासाच्या खोलीत किंवा ऑफिसमध्ये लावणं अत्यंत शुभ आहे. मात्र, बेडरूममध्ये हे चित्र टाळावं, कारण त्याची ऊर्जा ही गतिशीलतेची आहे आणि ती झोपेसाठी आवश्यक असलेल्या शांततेत अडथळा आणू शकते.
चित्राचा रंग महत्वाचा
चित्राच्या रंगालाही फार महत्त्व आहे. पांढऱ्या रंगाचे घोडे शांती, पवित्रता आणि संतुलित प्रगतीचे प्रतिक आहेत. घोडे जरी धावत असले तरी त्यांची मुद्रा आक्रमक नसावी. अशा चित्रामुळे घरात संतुलित उर्जा निर्माण होते. याशिवाय, हे चित्र नेहमी स्वच्छ, आदराच्या ठिकाणी ठेवणं आवश्यक आहे.
वास्तुशास्त्राचा सल्ला घेतल्यास तुमच्या घरात किंवा ऑफिसमध्ये सात घोड्यांचे चित्र लावणं केवळ शोभेसाठी नसून, तुमच्या जीवनात सकारात्मक बदल घडवण्यासाठी एक पाऊल ठरू शकतं.
