आपल्या घरातला सर्वात शांत, खास आणि आपल्याला मनःशांती देणारा कोपरा म्हणजे बेडरूम. हा केवळ झोपेसाठी नव्हे, तर दिवसभराच्या थकव्यापासून मुक्ती, विचारांना विराम, आणि आपल्या जवळच्या व्यक्तींसोबतच्या खास क्षणांचा भाग असतो. पण अनेक वेळा आपण नकळत अशा काही गोष्टी बेडरूममध्ये ठेवतो ज्या आपल्या आयुष्यात नकारात्मक परिणाम घडवू शकतात. वास्तुशास्त्र सांगतं की आपल्या आसपासच्या वस्तूंचा आपल्या मनःस्थितीवर आणि नातेसंबंधांवर खोल परिणाम होतो.
आरशाची जागा
बेडरूम सजवताना पहिली चूक आपण करतो ती म्हणजे आरशाची जागा. झोपताना जर तुमचा चेहरा आरशात दिसत असेल, तर त्याचा परिणाम मानसिक तणावाच्या रूपाने जाणवू शकतो. तुम्ही आरसा ठेवू इच्छित असाल, तर तो अशा जागी ठेवा जिथून तुमचा प्रतिबिंब झोपताना दिसणार नाही.
देवाचे फोटो
काही लोकांना देवाचे फोटो बेडरूममध्ये लावायची सवय असते, पण वास्तुशास्त्रानुसार देवांची मांडणी ही पूजाघरापुरती मर्यादित असावी. कारण बेडरूम हे खासगी आणि विश्रांतीचं स्थान आहे. तिथे देवतेचा वास ठेवणं म्हणजे त्या पवित्रतेला अनवधानाने बाधा आणणं ठरू शकतं.
खोलीतील इतर फोटो
याशिवाय, आपल्या खोलीतील फोटोंकडेही लक्ष देणं गरजेचं आहे. एकटे बसलेले, रडणारे मूल, कोरडी झाडं, किंवा उजाड रस्त्याचे चित्र ही सगळी दृश्ये मनावर नकळत नकारात्मक परिणाम करतात. आपण अशा चित्रांऐवजी, आनंददायी, निसर्गस्नेही किंवा प्रेरणादायी कलाकृती लावाव्यात.
तुटलेल्या वस्तु
तुटलेल्या वस्तूंना काही लोक जपून ठेवतात, भावना म्हणून. पण बेडरूममध्ये तुटलेली घड्याळं, भंगलेली मूर्ती, किंवा बंद पडलेली वस्तू ठेवल्यास नातेसंबंधात तणाव वाढतो आणि मनःशांती दूर जाते. अशा गोष्टींना योग्य वेळी निरोप देणं अधिक हितकारक ठरतं.
बेडखाली वस्तू ठेवणे
आपल्याला जागेची बचत करायची असते म्हणून आपण अनेकदा बेडखाली वस्तू ठेवतो. जुन्या फाईल्स, शूज, किंवा लोखंडी वस्तू. पण हीच बेडखालची जागा अडथळा बनते शांत झोपेसाठी. उर्जा इथे साचते आणि ती आपल्या मनःस्थितीवर परिणाम करते.
पुस्तके
काही जण बेडरूममध्ये पुस्तके ठेवत असतात. यात काही अडचण नाही, पण त्यांच्या विषयाकडे लक्ष देणं गरजेचं आहे. हिंसक कथा, दुःखद बातम्या किंवा त्रासदायक माहिती असणारी पुस्तके बेडरूममध्ये ठेवणे टाळा. ती तुम्हाला झोपायच्या आधी चिंताग्रस्त बनवू शकतात.
टोकदार शोपीस
आणखी एक गोष्ट म्हणजे तीक्ष्ण किंवा टोकदार शोपीस. तलवारी, बाण, किंवा युद्धदृश्ये दाखवणारे सजावटीचे वस्तू या गोष्टी बेडरूमच्या शांततेला बाधा आणतात. अशा सजावटीमुळे घरात मतभेद, अडथळे, किंवा मनःशांतीचा अभाव जाणवू शकतो. त्यामुळे सुखी जीवनासाठी बेडरूममध्ये वरीलपैकी कोणत्याच गोष्टी ठेवू नये.
