विमान प्रवास म्हणजे रोमांचक अनुभव, पण या प्रवासात आरामदायी वाटण्यासाठी काही गोष्टी लक्षात घेणे गरजेचे असते. आपण अनेकदा ट्रिपसाठी तयारी करताना फॅशनेबल कपड्यांवर भर देतो, पण विमानात नेमकं काय घालावं आणि काय टाळावं, हे फार कमी लोकांना ठाऊक असतं. विमानात असताना तुमच्या शरीराच्या गरजा आणि सुरक्षिततेला महत्त्व देणं जास्त आवश्यक आहे. याबाबत एका अनुभवी विमान परिचारिका सिल रिडेल.ने माहिती दिली आहे.
सिल रिडेल, जी स्वतः एक फ्लाइट अटेंडंट असून सोशल मीडियावर तिने विमानप्रवासाबद्दल अनेक उपयुक्त गोष्टी शेअर केल्या आहेत. तिच्या अनुभवावर आधारित काही कपड्यांचे पर्याय असे आहेत जे तुम्ही फ्लाइटमध्ये टाळले पाहिजेत, कारण ते फक्त फॅशनपुरतेच मर्यादित नसतात, तर प्रत्यक्षात ते तुमच्या आरोग्याला आणि सुरक्षिततेला धोका पोहोचवू शकतात.
क्रॉप टॉप आणि शॉर्ट्स
उदाहरणार्थ, क्रॉप टॉप आणि शॉर्ट्स हे कपडे कदाचित स्टायलिश वाटतील, पण 38,000 फूट उंचीवरचा हवामानाचा परिणाम तुमच्या शरीरावर थेट होतो. विमानाच्या आत असलेल्या थंड वातावरणमुळे पोट आणि मांड्यांमध्ये थंडी भरू शकते आणि प्रवास संपल्यावर आजारपण येऊ शकते.
फ्लिप फ्लॉप
फ्लिप फ्लॉपसुद्धा एक आकर्षक आणि सहज वापरता येणारा पर्याय वाटतो, पण प्रत्यक्षात विमानात आणीबाणीची वेळ आली, तर ते तुमच्या पायांचे संरक्षण करत नाहीत. शिवाय अनेक प्रवासी विमानात ते काढून टाकतात आणि अनवाणी फिरतात, जे स्वच्छतेच्या दृष्टीनेही योग्य नाही.
पॉलिस्टर आणि सिंथेटिक कपडे
तसेच, पॉलिस्टर आणि इतर सिंथेटिक कपड्यांबद्दल सावध राहणं गरजेचं आहे. अशा कपड्यांमध्ये जर चुकून आग लागली, तर ते त्वचेला चिकटून जळतात, ज्यामुळे गंभीर जखमा होऊ शकतात. कापसासारखे नैसर्गिक आणि हवेशीर कपडे यासाठी अधिक सुरक्षित पर्याय ठरतात.
टाइट्स आणि लेगिंग्ज
टाइट्स आणि लेगिंग्जसुद्धा विमानप्रवासासाठी योग्य वाटू शकतात, पण जास्त वेळ अशा घट्ट कपड्यांमध्ये राहिल्यास रक्ताभिसरणावर परिणाम होऊ शकतो. शिवाय, आपत्कालीन परिस्थितीत ते त्वचेचे नुकसान करू शकतात. आणि शेवटी फारच घट्ट कपडे टाळावेत. जमिनीवर जे कपडे फिट बसतात, ते उड्डाणाच्या वेळी शरीर फुगल्यामुळे अति घट्ट वाटू शकतात आणि त्यामुळे तुमचा संपूर्ण प्रवास अस्वस्थतेत जातो.
