भारतात लाखो लोक रोज रेल्वेने प्रवास करतात, पण बहुतेकांना हेच माहीत नसतं की त्यांच्या हातात असलेलं छोटंसं तिकीट केवळ प्रवासाची परवानगीच देत नाही, तर त्यामागे अनेक आश्चर्यकारक फायदेही लपलेले असतात. जेव्हा तुम्ही ट्रेनचं तिकीट बुक करता, तेव्हा तुम्ही नकळत काही खास सुविधा मिळवण्याचा हक्कसुद्धा मिळवता, ज्या केवळ आरामदायीच नव्हे तर कधी कधी खूप उपयुक्तही ठरतात.
निवासाची सोय
तुमचं रेल्वे तिकीट तुम्हाला चांगल्या निवासाची सोयही करून देऊ शकतं. जर तुमचं तिकीट कन्फर्म असेल, तर तुम्ही IRCTC च्या वसतिगृहात फक्त ₹150 मध्ये 24 तासांसाठी थांबू शकता. यामध्ये तुम्हाला स्वच्छ बेड, प्रायव्हेट वॉशरूम आणि आरामदायक वातावरण मिळतं, तेही बाजारातल्या इतर पर्यायांपेक्षा खूपच कमी खर्चात. ही सोय विशेषतः एकट्याने किंवा कौटुंबिक प्रवास करणाऱ्यांसाठी खूप मोलाची ठरते.
तसंच, ट्रेनमध्ये एसी कोचमधून प्रवास करताना तुम्हाला उशी, ब्लँकेट आणि बेडशीट मिळतातच. पण एखाद्या कारणाने जर ट्रेनमधून त्या गोष्टी मिळाल्या नाहीत, तरीही घाबरायचं काहीच कारण नाही. तुमचं तिकीट दाखवलं की हे साहित्य मागवता येतं, तेही कोणतेही अतिरिक्त पैसे न देता. हे सगळं तुमच्या सुखकर प्रवासासाठी रेल्वेने आखलेलं असतं.
वैद्यकीय मदत
प्रवास करताना आरोग्य बिघडल्यास, तुमच्या एका कॉलवर तुमच्यापर्यंत वैद्यकीय मदत पोहोचवली जाऊ शकते. केवळ 139 या हेल्पलाइनवर कॉल करून किंवा ट्रेनमधल्या कर्मचाऱ्यांना सांगून, आयआरसीटीसीकडून तातडीची वैद्यकीय सेवा मिळवता येते.
मोफत जेवण
प्रीमियम गाड्यांमधून प्रवास करणाऱ्यांसाठी आणखी एक आनंददायी गोष्ट म्हणजे मोफत जेवण. राजधानी, शताब्दी किंवा दुरांतोसारख्या गाड्यांमध्ये प्रवाशांना गरम जेवण दिलं जातं. आणि जर ट्रेन 2 तासांहून जास्त उशीराने पोहोचत असेल, तर आयआरसीटीसीकडून मोफत जेवणाची सोय स्थानकावरही केली जाते. अशा प्रसंगी खिशाला झळ न लागता भुकेचा प्रश्न सुटतो.
लॉकर रूम्स
कधी कधी ट्रेन उशिरा असल्यामुळे संपूर्ण दिवस स्थानकावर घालवावा लागतो. अशा वेळी आपलं सामान सांभाळणं मोठं कठीण जातं. पण रेल्वे स्थानकांवर असणाऱ्या क्लोकरूम किंवा लॉकर रूम्समुळे हा प्रश्नही सुटतो. फक्त तिकीट दाखवून, अत्यंत कमी दरात तुमचं सामान तिथे ठेवलं जाऊ शकतं आणि तुम्ही निर्धास्तपणे शहरात फिरू शकता.
प्रवास विमा
सर्वात महत्त्वाचं म्हणजे, रेल्वे तिकीट बुक करताना फक्त ₹0.45 भरून तुम्ही ₹10 लाखांपर्यंतचा प्रवास विमा मिळवू शकता. कोणतीही दुर्दैवी घटना घडल्यास, हा विमा तुमच्या कुटुंबासाठी मोठा आधार ठरू शकतो. इतक्या कमी किंमतीत इतका मोठा संरक्षण कवच मिळणं ही खरंच मोठी गोष्ट आहे.
