अहिल्यानगर जिल्ह्यात शिक्षणाच्या क्षेत्रात एक प्रेरणादायी आणि ऐतिहासिक पाऊल उचलण्यात आले आहे. मलाला दिनाचे औचित्य साधत, ‘स्नेहालय’ संस्थेच्या पुढाकाराने जिल्ह्यात एक प्रभावी शिक्षण जनजागृती अभियान राबवण्यात आले. यामध्ये तब्बल ६ हजारहून अधिक मुलींनी ‘मी पदवी घेतल्याशिवाय लग्न करणार नाही’ अशी शपथ घेत, शिक्षणासाठी आपली बांधिलकी दृढ केली.
‘अहिल्यानगर जिल्हा बालविवाहमुक्त करण्यासाठी’ स्नेहालयच्या उडान, बालभवन आणि फॅमिली बेस केअर या प्रकल्पांच्या संयुक्त विद्यमाने राबवण्यात आलेल्या या मोहिमेमुळे जिल्ह्यात मुलींच्या शिक्षणासाठी सकारात्मक जागर निर्माण झाला आहे. जेऊर ग्रामपंचायत, संतुकनाथ इंग्लिश विद्यालय आणि उच्च माध्यमिक विद्यालय, जेऊर यांच्या सहकार्याने एक सशक्त आणि भावनिकदृष्ट्या भिडणारा कार्यक्रम पार पडला.
या अभियानात प्रवीण कदम यांनी थेट मुलींशी संवाद साधत शिक्षणाचे महत्त्व अधोरेखित केले. त्यांनी बालविवाहाचे सामाजिक आणि मानसिक परिणाम विशद करत, शिक्षण हेच जीवन बदलण्याचे खरे साधन आहे, असा संदेश दिला.संगीता सानप यांनी नोबेल पारितोषिक विजेती मलाला युसुफझाई हिच्या संघर्षाची प्रेरक कहाणी सांगत मुलींमध्ये आत्मविश्वास जागवला.
प्रवीण कदम यांच्या म्हणण्यानुसार, ‘मलाला फंड’मुळे जगभरात २ कोटीहून अधिक मुलींना शिक्षणाची संधी मिळाली आहे. हा बदल फक्त आकड्यांपुरता मर्यादित नसून, तो एक सामाजिक क्रांती आहे. अहिल्यानगरमधील मुलीही आता त्या परिवर्तनाचा भाग बनत आहेत.
या मोहिमेत विविध सृजनशील माध्यमांचा वापर करण्यात आला. पदयात्रा, पथनाट्य, व्याख्यानं, सेल्फी पॉइंट्स, माहितीपत्रक वितरण, आणि आठवडे बाजारांमधील थेट संवाद या मार्गांनी २२ हजार नागरिकांपर्यंत प्रभावी संदेश पोहोचवण्यात आला. शाळा, गावांतील वस्त्या, झोपडपट्ट्या आणि ग्रामीण भागांतही हा उपक्रम राबवण्यात आला.
या अभियानामुळे केवळ जनजागृतीच झाली नाही, तर काही ठिकाणी निश्चित झालेले बालविवाह थांबवण्यात यश मिळाले. अनेक पालकांनी आपली मुलगी शिकवण्याचा निर्णय घेतला. त्यामुळे समाजात सकारात्मक आणि बदलते वातावरण तयार झाले आहे.
अहिल्यानगर जिल्ह्यात सुरू झालेला हा शिक्षण जागर म्हणजे केवळ शपथविधी नव्हे, तर भविष्य घडविण्याची सुरुवात आहे. मुलींच्या सशक्तीकरणासाठी शिक्षण हे अत्यंत महत्त्वाचे माध्यम ठरत आहे. स्नेहालयसारख्या संस्था, स्थानिक प्रशासन, शाळा, शिक्षक आणि स्वयंसेवक यांच्या समन्वयातून हा लढा अधिक व्यापक होईल, अशी आशा आहे. शिक्षणाचा प्रकाश घेऊन ही मुलगी आता केवळ स्वतःचे नव्हे, तर समाजाचेही भविष्य उजळवणार आहे.
