पाथर्डीच्या भाजी बाजारात सध्या एक वेगळंच चित्र दिसत आहे. शेतकऱ्यांनी मेहनतीने पिकवलेल्या पालेभाज्या बाजारात आणल्या, पण त्या विकायला ग्राहकच नाहीत. कष्टाने उगवलेली मेथी, शेपू, कोथिंबीर यांना आता कवडीमोल भाव मिळतोय, आणि तरीही कोणी घ्यायला तयार नाही. शेवटी हताश होऊन शेतकऱ्यांना आपला माल रस्त्यावर भटकणाऱ्या जनावरांसमोर टाकावा लागतोय. ही परिस्थिती पाहून कोणाच्याही मनाला चटका लागेल.
पाथर्डीत दर बुधवारी आणि रविवारी मोठा आठवडा बाजार भरतो. याशिवाय रोज सकाळी सात ते दहा वाजेपर्यंत छोटा बाजारही लागतो. या बाजारात पालक, मेथी, शेपू, कोथिंबीर, लिंबू, करडी, आंबट चुका, तांदूळजा यांसारख्या पालेभाज्या मोठ्या प्रमाणात येतात.
पण मागणी इतकी कमी आहे की, या भाज्यांना घेणारं कोणीच नाही. उदाहरणच द्यायचं तर, कोथिंबिरीची मोठी जुडी फक्त पाच ते दहा रुपयांना मिळते, आणि तरीही ती कुणी घेत नाही. सकाळी अकरा वाजले की शेतकरी पाच रुपये जुडी असं ओरडतात, पण ग्राहकांचा पत्ता नसतो. शेवटी काय, सगळ्या भाज्या जनावरांसमोर टाकून शेतकरी रिकाम्या हाताने घरी परततात.
या शेतकऱ्यांचं दु:ख फक्त भाज्या न विकल्या जाण्यापुरतं मर्यादित नाही. गावातून बाजारात येण्यासाठी त्यांना २० ते ५० रुपये भाडं खर्च करावं लागतं. मग बाजारात बसण्यासाठी २० रुपयांची पावती फाडावी लागते. पण मेथी किंवा शेपची एक जुडी विकली तरी इतके पैसे मिळत नाहीत. विशेषत: आधुनिक पद्धतीने पिकवलेली कोथिंबीर तर एका दिवसापेक्षा जास्त टिकत नाही. याला ना चव, ना वास, त्यामुळे ग्राहक तिकडे ढुंकूनही बघत नाहीत. अशा परिस्थितीत शेतकऱ्यांचं मोठं नुकसान होतंय.
सध्या फक्त दोडका आणि शेवगा या भाज्यांना काहीसा भाव आहे. वांग्याचे दरही थोडे वाढलेत. लिंबू १५ ते २० रुपये किलोने मिळतंय. पण करडी, तांदूळजा, चंदा बटवा यांसारख्या भाज्यांना कोणी विचारतच नाही. अळूची पानं, बटाटे, कांदा, गावरान आणि हायब्रीड लसूण यांचे भावही गडगडलेत. कोबी ३० ते ४० रुपये किलोने विकली जाते, पण मेथी, शेपू आणि कोथिंबिरीची अवस्था तर इतकी वाईट आहे की, जनावरंही आता त्या खायला तयार नाहीत.
रविवारचा बाजार हा पाथर्डीचा सगळ्यात मोठा बाजार असतो. या दिवशी ग्राहकांची गर्दीही जास्त असते, कारण बाहेरगावचे व्यापारीही येतात. भाव मिळाला नाही तर कोथिंबीर आणि शेपू विकणारे शेतकरी आपला माल जनावरांसमोर फेकून देतात आणि खिन्न मनाने रिकाम्या हाताने गावाकडे परततात.
