Pune News : तुम्ही पुणेकर आहात आणि मेट्रोने प्रवास करता का? मग तुमच्यासाठी एक महत्त्वाची बातमी आहे. सध्या स्थितीला पुण्यात दोन मेट्रो मार्ग सुरू आहेत.
पिंपरी चिंचवड महापालिका ते स्वारगेट आणि वनाज ते रामवाडी या मार्गांवर सध्या मेट्रो धावत आहे. दरम्यान गेल्या काही महिन्यांपासून पुण्यातील काही मेट्रोस्थानाकांची नावे बदलण्याची मागणी उपस्थित केली जात होती आणि हीच मागणी आता पूर्ण झाली आहे.
पुणे मेट्रो प्रशासनाने प्रवाशांच्या सोयीसाठी आणि शहराच्या स्थानिक ओळखीला अधिक महत्त्व देत एक महत्त्वाचा निर्णय घेतला आहे. पुणे मेट्रो प्रकल्पातील काही मेट्रो स्थानकांची नावे अधिक ओळखीची, ऐतिहासिक आणि परिसराशी सुसंगत अशी बदलण्यात आली आहेत.
या निर्णयामुळे गेल्या अनेक दिवसांपासून प्रवाशांकडून आणि सामाजिक संघटनांकडून होत असलेली मागणी अखेर पूर्ण झाली असून, पुणेकरांमध्ये समाधान व्यक्त केले जात आहे.
महामेट्रोने दिलेल्या माहितीनुसार, पुणे मेट्रो प्रकल्पातील तीन महत्त्वाच्या स्थानकांचे नामकरण बदलण्यात आले आहे. मंडई मेट्रो स्थानकाचे नाव आता ‘महात्मा फुले मंडई’ असे करण्यात आले आहे.
नळस्टॉप मेट्रो स्थानकाचे नाव ‘एसएनडीटी’ तर आयडियल कॉलनी मेट्रो स्थानकाचे नाव ‘पौड फाटा’ असे बदलण्यात आले आहे. येत्या काही दिवसांत या सर्व स्थानकांवरील नेमप्लेट, दिशादर्शक फलक आणि अन्य माहितीफलक नव्या नावांनुसार बदलण्याचे काम पूर्ण केले जाणार असल्याचे महामेट्रोतर्फे स्पष्ट करण्यात आले आहे.
या नामांतरामागे स्थानिक नागरिक, लोकप्रतिनिधी आणि विविध सामाजिक संघटनांची मोठी भूमिका राहिली आहे. विशेषतः मंडई परिसरातील मेट्रो स्थानकाला समाजसुधारक महात्मा ज्योतिराव फुले यांचे नाव देण्यात यावे, अशी मागणी सातत्याने करण्यात येत होती.
माळी महासंघासह विविध संघटनांनी याबाबत महामेट्रोकडे निवेदने दिली होती. मागणी मान्य न झाल्यास आंदोलन छेडण्याचा इशाराही देण्यात आला होता. अखेर केंद्र सरकारकडून या नामकरणाला अधिकृत मंजुरी मिळाल्यानंतर हा निर्णय अमलात आणण्यात आला.
वनाझ ते रामवाडी मार्गिकेवरील नळस्टॉप मेट्रो स्थानक एसएनडीटी महिला विद्यापीठाच्या जवळ असल्यामुळे त्याला ‘एसएनडीटी’ हे नाव देण्यात आले आहे. त्याचप्रमाणे, आयडियल कॉलनी परिसरातील एक महत्त्वाचा आणि ओळखीचा चौक म्हणून ओळख असलेल्या ‘पौड फाटा’ या नावावरून स्थानकाचे नामकरण करण्यात आले आहे.
या नव्या नावांमुळे प्रवाशांना मेट्रो स्थानक ओळखणे अधिक सोपे होणार असून, दिशाभूल होण्याचे प्रमाण कमी होण्याची शक्यता आहे. स्थानिक इतिहास, सामाजिक योगदान आणि परिसराची ओळख जपणारे हे नामकरण पुणे मेट्रोच्या प्रवासाला अधिक सुकर आणि नागरिकाभिमुख बनवणार असल्याचे मत पुणेकर व्यक्त करत आहेत.