CONCOR Bonus Shares:- शेअर बाजारात कंटेनर कॉर्पोरेशन ऑफ इंडिया लिमिटेड या नवरत्न कंपनीकडून आलेल्या एका विशेष घोषणेमुळे गुंतवणूकदारांमध्ये उत्सुकता निर्माण झाली आहे. कंपनीने आपल्या भागधारकांना बोनस शेअर्स देण्याचा निर्णय घेतला आहे. हा बोनस वाटपाचा निर्णय कंपनीकडून पाचव्यांदा घेतला जात आहे आणि त्यामुळे या बातमीकडे बाजाराचे लक्ष लागले आहे.
कंपनीने काय दिली माहिती?
CONCOR म्हणजेच कंटेनर कॉर्पोरेशनने यावेळी 1:4 च्या प्रमाणात बोनस शेअर्स देणार असल्याचं स्पष्ट केलं आहे. याचा अर्थ असा की, ज्याच्याकडे चार शेअर्स आहेत त्याला एक अतिरिक्त शेअर मोफत मिळणार आहे. हा बोनस मिळवण्यासाठी कोणत्या दिवशी शेअर्स असणे गरजेचे आहे, म्हणजेच ‘रेकॉर्ड तारीख’ कंपनीने 4 जुलै 2025 अशी जाहीर केली आहे. या बातमीनंतर शुक्रवारी कंपनीचे शेअर्स किंचित वाढले आणि 730.95 रुपयांवर बंद झाले.
हा बोनस वाटप कंपनीकडून काहीसा परिचित प्रकार आहे. कारण याआधी चार वेळा CONCOR ने अशीच घोषणा केली होती. सर्वप्रथम एप्रिल 2008 मध्ये 1:1 च्या प्रमाणात, त्यानंतर सप्टेंबर 2013 मध्ये 1:2, एप्रिल 2017 आणि फेब्रुवारी 2019 मध्ये 1:4 अशा पद्धतीने कंपनीने बोनस शेअर्स वाटले होते. म्हणजेच, यापूर्वीच्या बोनस इतिहासात कंपनीने नियमितपणे आपल्या गुंतवणूकदारांना काही ना काही परतावा देण्याचा प्रयत्न केला आहे.
याशिवाय, कंपनीने शेअर स्प्लिटचाही निर्णय घेतला होता. जून 2018 मध्ये 10 रुपये दर्शनी मूल्याच्या शेअर्सना विभागून 5 रुपये दर्शनी मूल्याचे दोन शेअर्स करण्यात आले होते. या निर्णयामुळे लहान गुंतवणूकदारांसाठी शेअर विकत घेणं आणखी सुलभ झालं.
गुरुवारी म्हणजे 19 जून 2025 रोजी कंपनीचा शेअर 726.50 रुपयांवर बंद झाला होता. मागील एका वर्षात या शेअरमध्ये सुमारे 34 टक्क्यांची घसरण झाली आहे. मात्र दीर्घकालीन चित्र वेगळं आहे. मागील पाच वर्षांमध्ये या शेअरने तब्बल 77 टक्क्यांहून अधिक परतावा दिला आहे. त्यामुळे शॉर्ट टर्ममध्ये काहीशी अस्थिरता असली तरी, दीर्घकालीन गुंतवणूकदारांसाठी हा शेअर सकारात्मक संकेत देत असल्याचं दिसतं.
