नाॅर्मल वाटणाऱ्या ‘या’ सवयीच बनू शकतात हार्ट अटॅकचं कारण; आरोग्य तज्ञांनी दिला धोक्याचा इशारा!

आपल्यापैकी बहुतेकांना वाटतं की हृदयविकाराचा संबंध फक्त वयस्कर लोकांशी किंवा कधीतरी होणाऱ्या अनुवंशिक आजारांशी असतो. पण सध्याच्या धावपळीच्या आणि बदलत्या जीवनशैलीच्या काळात, हृदयाशी संबंधित आजार हे केवळ वयस्करांचं नव्हे, तर तरुण व मध्यमवयीन लोकांचंही एक मोठं आरोग्याचं संकट बनतं चाललं आहे. विशेष म्हणजे, आपण रोजचं जे खातो, ज्या सवयी अंगी बाणवतो त्यांचाच हळूहळू आपल्या हृदयावर खोलवर परिणाम होत जातो, आणि आपल्याला कळतही नाही.

आपण जरी तळलेले पदार्थ, जंक फूड किंवा साखरयुक्त पेये टाळत असलो, तरी काही चुकीच्या आहारपद्धती आणि दुर्लक्षित सवयी आपल्या हृदयाला घातक ठरत असतात. आरोग्यतज्ज्ञांच्या मतानुसार, आपल्या आतड्यांमध्ये असलेले सूक्ष्मजीव, म्हणजेच गट बॅक्टेरिया, हे केवळ पचनासाठीच नाही, तर हृदयाच्या आरोग्यासाठीसुद्धा महत्त्वाचे असतात. या बॅक्टेरियांमुळे तयार होणाऱ्या काही संयुगांमुळे, विशेषतः TMAO नावाच्या घटकामुळे, आपल्या हृदयाच्या रक्तवाहिन्यांमध्ये संकोचन निर्माण होऊ शकतं आणि त्यामुळे हृदयविकाराचा धोका अधिक वाढतो.

आतड्यांचं अस्वास्थ्य

हृदयाचं आरोग्य बिगडण्यामागे अनेकदा एक मोठं कारण असतं आतड्यांचं अस्वास्थ्य. जेव्हा आपल्या आतड्यांमध्ये चांगले बॅक्टेरिया कमी होतात, तेव्हा शरीरात सूज वाढू लागते, रक्तदाब अनियंत्रित होतो, कोलेस्ट्रॉलची पातळी बदलते आणि हे सगळं बऱ्याचदा कोणतीही ठोस लक्षणं न देता सुरू होतं. यासाठी आहारात फायबरचं प्रमाण कमी असणं हे विशेषतः हानिकारक ठरतं. फळं, भाज्या, संपूर्ण धान्य आणि कडधान्यांचा समावेश हे चांगले बॅक्टेरिया वाढवण्यास मदत करतात, आणि आतड्यांमधील सूज कमी करतात, जी थेट हृदयावर परिणाम करत असते.

प्रक्रिया केलेलं अन्न

अनेकजण सहजतेने खाण्यात येणारं प्रक्रिया केलेलं अन्न, म्हणजेच पॅकेट्समध्ये मिळणारं, जास्त दिवस टिकणारे खाद्यपदार्थ रोज खाण्यात घेतात. परंतु या अन्नात ट्रान्स फॅट्स, मीठ आणि कृत्रिम संरक्षक भरपूर प्रमाणात असतात. यामुळे ना फक्त आपल्या आतड्यांतील बॅक्टेरिया नष्ट होतात, तर आपल्या चयापचय प्रक्रियेलाही धक्का बसतो, ज्याचा थेट परिणाम हृदयावर होतो. तसंच, रोजचं जास्त प्रमाणात लाल मांस किंवा अंडी खाणंही TMAO सारख्या घटकांची पातळी वाढवू शकतं, ज्यामुळे धमन्या अरुंद होण्याचा धोका वाढतो.

ताणतणाव आणि पाण्याची कमतरता

हृदयाच्या आरोग्यावर ताणतणाव आणि पाण्याची कमतरता हे दोन महत्त्वाचे पण अनेकदा दुर्लक्षित घटक आहेत. शरीरात पाण्याची योग्य पातळी राखल्याने केवळ पचन सुधारत नाही, तर रक्तप्रवाह सुरळीत राहतो आणि शरीर निर्जलीकरण होण्यापासून वाचतं. तणाव मात्र हळूहळू शरीरात सूज निर्माण करतो, हार्मोन्स बिघडवतो आणि हृदयावर दबाव वाढवतो. त्यामुळे दररोज थोडा वेळ स्वतःसाठी घेणं, आराम करणं हे देखील तितकंच आवश्यक आहे.

त्याचबरोबर ‘प्रोबायोटिक’ अन्नपदार्थ, जे चांगल्या बॅक्टेरियांच्या वाढीस मदत करतात. उदा. दही, केफिर, किमची हे सगळे पदार्थ आपल्या आतड्यांमध्ये पोषक बॅक्टेरिया निर्माण करतात आणि त्यामुळे शरीरातील सूज कमी होण्यास मदत होते, जे हृदयासाठी लाभदायक आहे.