लांब, काळेभोर आणि जाड केस हे प्रत्येक स्त्रीचं एक स्वप्न असतं. विशेषतः जेव्हा आपण बॉलिवूडच्या अभिनेत्री रेखाबद्दल बोलतो, तेव्हा तिच्या सौंदर्याचा सगळ्यात ठसठशीत भाग म्हणजे तिचे केस. वयाच्या 70 व्या वर्षात असली, तरी तिच्या झुलत्या, दाट केसांकडे पाहून कुणाचंही लक्ष त्यावरच स्थिरावतं. त्या केसांमागे असलेली सातत्यपूर्ण निगा आणि नैसर्गिक उपचारांची शिस्त हीच तिची खरी सौंदर्यसंपदा आहे.
आजच्या काळात मात्र केसांची स्थिती फारशी चांगली राहिलेली नाही. वाढतं प्रदूषण, कमी झोप, तणाव, चुकीच्या खाण्याच्या सवयी आणि सतत केमिकल प्रॉडक्ट्सचा वापर यामुळे केस गळणे, फुटणे आणि वाढ न होणे ही सामान्य तक्रार झाली आहे. अनेकदा आपल्याला वाटतं की रेखासारखे केस आपल्यालाही मिळावेत, पण नुसत्या इच्छा करून हे शक्य नाही. मात्र काळजीपूर्वक केलेला एक घरगुती उपाय या इच्छेला साकार रूप देऊ शकतो.
नैसर्गिक पेस्ट
केस लांब, मजबूत आणि दाट करण्यासाठी एका खास मिश्रणाचा उपयोग केला जातो आणि त्यात वापरल्या जाणाऱ्या वस्तू आपल्याच स्वयंपाकघरात सहज मिळू शकतात. हिरवी मेंदी, कोरफड, लिंबाचा रस आणि आवळा या चार गोष्टी एकत्र करून तयार केलेली पेस्ट केसांच्या आरोग्यासाठी एक जादूच ठरते.
ही पेस्ट तयार करायची तर सगळ्यात आधी वरील चार घटक थोड्या प्रमाणात घ्यावेत. कोरफडच्या गरात मेंदी मिसळून त्यात लिंबाचा रस आणि आवळ्याचा रस घालावा. हे मिश्रण एकसंध वाटून घेतल्यावर ते मुळांपासून केसांच्या टोकांपर्यंत नीट लावावं. एकदा ते सुकल्यावर सौम्य शाम्पूने केस धुवावेत.
महिन्यातून दोनदा करा उपाय
हे उपचार दर महिन्यात एकदा किंवा दोनदा नियमितपणे केले, तर केसांना पोषण मिळतं, गळती कमी होते आणि केसांची वाढ अधिक गतीने होते. या घरगुती उपायांचा फायदा असा की त्यात कोणताही साईड इफेक्ट नसतो आणि ते संपूर्ण नैसर्गिक असतात.
