आजच्या जगात महिलांसाठी आयुष्याची दिशा पारंपरिक चौकटींपेक्षा वेगळी झाली आहे. शिक्षण, करिअर, स्वप्नं आणि जबाबदाऱ्या सांभाळताना अनेक स्त्रिया आई होण्याचा निर्णय 35 वर्षांनंतर घेतात. ही निवड केवळ वेळेची गरज नसून, स्वतःच्या आयुष्याची जबाबदारीने घेतलेली एक महत्त्वाची पायरी असते. पण या प्रवासात काही अनोख्या अडथळ्यांनाही सामोरं जावं लागतं. शारीरिक, भावनिक आणि सामाजिक पातळीवर.
35 वर्षांच्या पुढे शरीरात नैसर्गिक बदल झपाट्याने होऊ लागतात. प्रजनन क्षमतेवरही याचा परिणाम होतो, पण याचा अर्थ असा नाही की उशिरा गर्भधारणा अशक्य आहे. उलट, थोडी जास्त जागरूकता आणि काळजी घेतली तर ही गर्भधारणा अधिक सुरक्षित, आरोग्यदायी आणि आनंददायक होऊ शकते. या टप्प्यावर वैद्यकीय देखरेख ही एक गरज बनते, कारण गर्भधारणेची प्रत्येक पायरी तुमचं आणि बाळाचं आरोग्य ठरवणारी ठरते.
आवश्यक आरोग्य चाचण्या
अशा वेळी स्त्रीच्या शरीराला आणि मनाला योग्य पोषणाची, विश्रांतीची आणि मार्गदर्शनाची गरज असते. डॉक्टरांच्या सल्ल्यानुसार वेळोवेळी आवश्यक चाचण्या जसे की अल्ट्रासाऊंड, शुगर, रक्तदाब आणि थायरॉईड तपासण्या केल्या गेल्यास कोणताही धोका आधीच लक्षात येतो आणि योग्य उपचार शक्य होतो. फॉलिक अॅसिड आणि व्हिटॅमिन डी यांसारख्या घटकांचा पुरवठा सुरुवातीपासून सुरू ठेवणं फायदेशीर ठरतं.
आहार
तुमचा आहारही या काळात तितकाच महत्त्वाचा असतो. दूध, अंडी, हिरव्या भाज्या, दही, कडधान्यं आणि मशरूमसारखे नैसर्गिक स्रोत शरीराला ऊर्जा आणि बाळाला पोषण देतात. सकाळच्या कोवळ्या उन्हात 15 मिनिटं बसणं केवळ व्हिटॅमिन डी मिळवण्यासाठी नव्हे, तर मनाच्या शांतीसाठीही उपयोगी ठरतं. जेवणानंतर काही वेळ चालणे पचनासाठीही चांगले आहे.
मानसिक आरोग्य
या सगळ्या शारीरिक तयारीसोबतच मानसिक आरोग्य सांभाळणं तितकंच गरजेचं आहे. उशिरा मातृत्व स्वाभाविकच अधिक विचाराने, जबाबदारीने घेतलं जातं. पण या विचारांमध्ये तणाव, चिंता यांना वाव न देणं आवश्यक आहे. त्यामुळे समुपदेशन घेणं, ध्यान, योग किंवा स्वतःसोबत वेळ घालवणं या गोष्टी मानसिक शांतता आणि भावनिक संतुलन ठेवतात.
शेवटी, आयुष्याच्या या टप्प्यावर मातृत्वाकडे वाटचाल करणं म्हणजे स्वतःच्या शरीराशी आणि मनाशी पुन्हा एक नातं जुळवणं असतं. हे नातं जर नीट जपलं, तर 35 नंतरची आई होण्याची वाट फार सुंदर, समाधानी आणि आरोग्यपूर्ण ठरते.
