पोटात वारंवार गॅस तयार होणे, फुगणे आणि त्यामुळे होणारी अस्वस्थता ही आजच्या धावपळीच्या जीवनशैलीतील एक सामान्य पण तितकीच त्रासदायक समस्या बनली आहे. आपण काय खातो आणि किती खातो याकडे बऱ्याचदा लक्ष दिले जात नाही, मग पोटाच्या समस्या निर्माण झाल्या की आपल्याला हे सगळं आठवतं. या त्रासावर काही घरगुती आणि प्रभावी उपाय आपण पाहणार आहोत, जे त्वरित आराम देऊ शकतात आणि पचनक्रियाही सुधारतात.
खरं सांगायचं तर चुकीच्या वेळेला खाणं, तळलेले आणि अतिमसालेदार अन्न, तणावग्रस्त मानसिकता आणि हालचाल न करणे, यामुळे पोटात गॅस तयार होतो. यातून पोट फुगणं, गॅस, मळमळ, डोकेदुखी आणि कधी कधी थकवा जाणवतो. मात्र, तुम्हाला या त्रासातून सुटका मिळवायची असेल, तर स्वयंपाकघरात असलेले जिरे एक प्रभावी औषध ठरू शकते.
जिरे पाणी-
जिरे पाणी हे त्यासाठी खास फायदेशीर आहे. एक चमचा जिरे आणि एक ग्लास पाणी घेऊन, ते पाणी अर्धं होईपर्यंत उकळावं. मग ते गाळून कोमटपणे किंवा थोडं थंड झाल्यावर दिवसातून दोन वेळा पिणं सुरू करा. विशेषतः जेवणानंतर ते पाणी पिणे फायद्याचे आहे. हे जिरे पाणी केवळ गॅस दूर करत नाही, तर शरीरातील पाचक रसांना सक्रिय करतं, ज्यामुळे जेवलेलं अन्न नीट पचतं आणि पोट हलकं वाटतं.
याशिवाय जिरे पाण्याचे इतर फायदेही लक्षात घेण्यासारखे आहेत. ते पोटातील आम्लता कमी करतं, जळजळ थांबवतं आणि बद्धकोष्ठतेवरही प्रभावी ठरतं. गॅसने होणाऱ्या त्रासावर तर याचा उपयोग अगदी लगेच जाणवतो.
लिंबूपाणी
जिरे पाण्यासोबतच तुम्ही इतर साधे उपायही करू शकता. उदाहरणार्थ, सकाळी उठून कोमट लिंबूपाणी पिणं, यामुळे तुमचे पचन सुधारते. तसेच आजवाइन चघळणं, त्याचं पाणी पिणं, यामुळेही पोट हलकं राहतं. मात्र हे पदार्थ गरजेपेक्षा जास्त खाणं टाळा, अन्न नीट चावून खा आणि जेवणानंतर थोडंफार फिरा. अशा छोट्या सवयी मोठा फरक घडवतात.
