आपल्या जीवनात काही क्षण असे येतात जे स्मृतीत कोरले जातात. काही वेळा हे क्षण एखाद्या ऐतिहासिक घटनेमुळे, तर कधी निसर्गाच्या अद्भुत लीलांमुळे. 2 ऑगस्ट 2027 रोजी अशाच एका विलक्षण क्षणाचा अनुभव संपूर्ण जग घेणार आहे. त्या दिवशी जे काही होणार आहे ते केवळ एक खगोलीय घटना नाही, तर एक थक्क करणारा, विस्मयकारक आणि ऐतिहासिक अनुभव असेल. कारण या दिवशी होणार आहे 21 व्या शतकातील सर्वात मोठे आणि दीर्घकालीन पूर्ण सूर्यग्रहण.
सूर्यग्रहण ही नेहमीच आपल्यासाठी औत्सुक्याची बाब असते. आकाशात अचानक काळोख पसरतो, पक्षी शांत होतात, आणि आपण एका अशा निसर्गनाट्याचे साक्षीदार होतो, ज्यात पृथ्वी, चंद्र आणि सूर्य यांचा परिपूर्ण संगम दिसतो. पण 2027 मधील हे सूर्यग्रहण काहीसं वेगळं असणार आहे. हे पूर्ण सूर्यग्रहण तब्बल 6 मिनिटे चालणार असून, त्याचा परिणाम असा होणार की दिवसा देखील अंधार पडेल. या घटनेमुळे संपूर्ण जगाचे लक्ष त्या दिवशी आकाशाकडे लागून राहील.
कधी होणार सूर्यग्रहण?
हे सूर्यग्रहण सोमवार, 2 ऑगस्ट 2027 रोजी होणार असून ते मोरोक्को, अल्जेरिया, ट्युनिशिया, इजिप्त, सौदी अरेबिया, येमेन, सुदान, सोमालिया, स्पेन आणि ओमान या 10 देशांमध्ये पूर्ण स्वरूपात पाहायला मिळणार आहे. त्यामुळे त्या भागांमध्ये आकाशात सूर्यच नाहीसा झाल्यासारखा भास होईल, आणि काही क्षणांसाठी दिवसाची जागा अंधार घेईल. हे दृश्य केवळ वैज्ञानिक दृष्टिकोनातून नाही, तर भावनिकदृष्ट्याही एक अद्वितीय अनुभव असणार आहे.
भारतात दिसणार का?
आपण भारतात राहतो, म्हणून साहजिकच उत्सुकता असते की हे दृश्य आपल्याला दिसेल का.तर भारतातही हे सूर्यग्रहण पाहता येईल, पण ते आंशिक असेल. भारतीय वेळेनुसार हे ग्रहण दुपारी 3:34 वाजता सुरू होईल आणि संध्याकाळी 5:53 वाजता समाप्त होईल. आपल्याकडे पूर्ण सूर्यग्रहण नाही दिसले तरी, आकाशातील हळूहळू होत जाणारा बदल, प्रकाशाचा मंद झोत, हे सगळं नक्कीच पाहण्यासारखं असणार आहे.
जगभरातील खगोलप्रेमी, वैज्ञानिक, पर्यटक आणि अगदी सर्वसामान्य नागरिकही या घटनेचे साक्षीदार होण्यासाठी प्रवासाची योजना आखतील. हे सूर्यग्रहण केवळ एक दृश्य नसून, एक अनुभूती आहे जिथे विज्ञान, सौंदर्य आणि निसर्गाचं गूढ एकत्र येतं. त्यामुळे या दिवसाची नोंद आपल्या कॅलेंडरमध्ये करायला विसरू नका.
पण, अशा घटनांवेळी आपल्या डोळ्यांचं संरक्षण करणे अत्यंत आवश्यक आहे. सूर्यग्रहण पाहताना नेहमी प्रमाणित सुरक्षित चष्मे किंवा उपकरणांचा वापर करावा, कारण डोळ्यांना थेट सूर्याकडे पाहणं धोकादायक ठरू शकतं.
