शेतकऱ्यांच्या आयुष्यात स्थैर्य आणि दिलासा देणारी एक योजना म्हणजे पंतप्रधान किसान सन्मान निधी योजना. गेल्या काही वर्षांपासून या योजनेने लाखो कुटुंबांना आर्थिक मदतीचा मजबूत आधार दिला आहे. शेतीचा वाढता खर्च, बाजारातील अनिश्चितता आणि अस्थिर वातावरणमुळे ही योजना शेतकऱ्यांसाठी केवळ आर्थिक मदत नव्हे, तर आशेचा किरण ठरली आहे. आणि आता, या योजनेअंतर्गत मिळणारा 20 वा हप्ता लवकरच खात्यात जमा होणार असल्याच्या बातमीने अनेकांच्या चेहऱ्यावर हास्य फुललं आहे.
20 वा हप्ता कधी येणार?
2019 मध्ये सुरू झालेली ही योजना दर चार महिन्यांनी शेतकऱ्यांच्या खात्यात 2,000 रुपयांचा हप्ता जमा करून, दरवर्षी एकूण 6,000 रुपये आर्थिक मदत देते. याआधी 19 हप्ते यशस्वीपणे वितरित करण्यात आले आहेत. आता जून महिन्यात 20 वा हप्ता येण्याची शक्यता वर्तवण्यात येत आहे. त्यामुळे अनेक शेतकरी आपापल्या बँक खात्याकडे लक्ष ठेवून आहेत.
‘या’ 3 गोष्टी महत्वाच्या
मात्र यंदा सरकारने या हप्त्यासाठी काही महत्त्वाच्या अटी ठरवल्या आहेत. त्यात प्रमुख म्हणजे शेतकऱ्यांची ई-केवायसी, जमिनीची पडताळणी आणि नोंदणी या तीन बाबी वेळेत पूर्ण झालेल्या असाव्यात. अन्यथा, कितीही पात्र असलात तरी तुमचा हप्ता अडकू शकतो. ही कामं जवळच्या CSC केंद्रात किंवा pmkisan.gov.in या अधिकृत वेबसाइटवरून सहजपणे केली जाऊ शकतात.
या योजनेची व्याप्तीही गेल्या काही वर्षांत मोठ्या प्रमाणात वाढली आहे. सुरुवातीला केवळ दोन हेक्टरपर्यंत जमीन असलेल्या लहान आणि सीमांत शेतकऱ्यांनाच याचा लाभ मिळत होता. पण आता योजनेचा विस्तार झाल्यामुळे मोठ्या प्रमाणात शेतकरी याचा फायदा घेत आहेत. मात्र काही वर्गांना, जसं की सरकारी नोकरी करणारे, डॉक्टर, वकील, अभियंते आणि जे नियमित आयकर भरतात, त्यांना या योजनेपासून वगळण्यात आलं आहे.
यादीत नाव कसं तपासणार?
तुम्ही या योजनेचे लाभार्थी आहात की नाही, हे तपासण्यासाठी वेबसाइटवर जाऊन राज्य, जिल्हा, तालुका आणि गावाची माहिती भरून ‘रिपोर्ट मिळवा’ वर क्लिक केल्यास लाभार्थी यादी तुमच्या समोर येते. जर यादीत तुमचं नाव असेल, तर समजून घ्या की लवकरच तुमच्या खात्यात 20 वा हप्ता जमा होणार आहे.
एकंदरीत, PM Kisan च्या 20 व्या हप्त्याची ही बातमी म्हणजे हजारो शेतकऱ्यांसाठी एक दिलासादायक क्षण ठरत आहे. परंतु त्यासाठी थोडी दक्षता आवश्यक आहे. आवश्यक कागदपत्रं आणि प्रक्रिया वेळेवर पूर्ण करून घ्या, अन्यथा पैसे खात्यावर येण्यास अडचणी येऊ शकतात.
