ना जहाज, ना विमान…चीननं बनवलं सागरी युद्धासाठी भयानक शस्त्र! चीनचं ‘एक्रानोप्लान’ भारतासाठी नवं संकट?

पाण्याच्या विशालतेतून अचानक एक अद्भुत, थरारक आणि थोडंसं भीतीदायक दृश्य दिसतं. काहीसं जहाजासारखं, पण नक्कीच जहाज नाही… पाणबुडी वाटावी असा आकार, पण तीसुद्धा नाही. हे आहे चीनने तयार केलेलं एक अनोखं युद्धतंत्रज्ञान एक्रानोप्लान, ज्याला सैनिकी क्षेत्रात “समुद्रातील राक्षस” म्हणून ओळखलं जात आहे. भारताच्या शेजारी, चीनमधील बोहाई समुद्रात या भव्य यंत्राचं परीक्षण सुरू असून त्याचे काही दुर्मिळ फोटो आता जगासमोर आले आहेत.

एक्रानोप्लान

हे विमान काही सामान्य विमानासारखं नाही. याला विंग-इन-ग्राउंड इफेक्ट (WIG) तंत्रज्ञानावर आधारित बनवलं आहे. सोविएत युनियनने शीतयुद्ध काळात याच प्रकारच्या यंत्रांची निर्मिती केली होती. आता चीन हे विसरलेलं युद्धतंत्रज्ञान नव्याने जिवंत करत आहे. या विमानाची खासियत म्हणजे ते पाण्यावरून थेट उडू शकतं आणि केवळ समुद्रावरच नव्हे, तर नद्या, वाळवंटं, बर्फाळ क्षेत्रं यासारख्या कोणत्याही सपाट जागेवरून झेप घेऊ शकतं. त्यामुळे ते सहजपणे शत्रूच्या हद्दीत पोहोचू शकतं, तेही रडारपासून लपून.

बोहाई समुद्रावर प्रथमच हे विमान निळ्या पाण्यावर तरंगताना दिसलं. काही चित्रांमध्ये ते नौदलाच्या घाटावर उभं असताना दिसतं. अर्धवट झाकलेलं, पण त्याचा आकार पाहताच त्याची ताकद जाणवते. याच्या पुढील भागाचा आकार एखाद्या मोठ्या नौकेसारखा आहे आणि शेपटीचा भाग V-आकारात बनवलेला आहे. एक विशिष्ट रचना जी WIG विमानांना अधिक स्थिर बनवते.

वेग आणि वैशिष्ट्ये

चीन या विमानाचा उपयोग जलद किनारी वाहतूक, युद्धसामग्री पोहोचवणं, किंवा उभयचर सैनिकी मोहिमांसाठी करू शकतो. विशेष म्हणजे हे विमान सोव्हिएत युनियनने तयार केलेल्या “मरीन एक्रानोप्लान”सारखं दिसतं. जे 1960 च्या दशकात NATO च्या पाणबुड्यांवर हल्ला करण्यासाठी वापरण्यात यायचं. त्या सोव्हिएत यंत्राची उंची होती 72 फूट, पंखांचा विस्तार 123 फूट आणि कमाल वेग 310 मैल प्रतितास. हे एवढं मोठं होतं की बोईंग 747 पेक्षा देखील अधिक भव्य आणि वेगळं होतं.

सर्वात विशेष म्हणजे या राक्षसी विमानात आठ जेट इंजिन्स आहेत. प्रत्येकी एका ओळीत चार, जे त्याला वाऱ्याच्या वेगासोबतच समुद्रावरही नियंत्रण ठेवण्याची ताकद देतात. आणि हे काही केवळ प्रयोगापुरतं थांबत नाही, कारण अमेरिका सुद्धा याच पद्धतीचं शस्त्र तयार करत आहे. DARPA या अमेरिकेच्या लष्करी संशोधन संस्थेने ‘लिबर्टी लिफ्टर’ नावाचा एक प्रकल्प हाती घेतला आहे, जो 2027 पर्यंत पूर्ण होईल अशी अपेक्षा आहे. हे देखील एक ग्राउंड-इफेक्ट व्हेईकल (GEV) असेल जे मोठ्या प्रमाणावर लष्करी रसद वाहून नेण्याचं काम करेल.

या सर्व घडामोडी भारतासाठी विशेष लक्ष ठेवण्यासारख्या आहेत. कारण समुद्रावर वर्चस्व राखण्याच्या या नव्या शर्यतीत चीन आणि अमेरिका नव्या दिशा गाठत आहेत. भारताच्या शेजारी इतक्या शक्तिशाली आणि वेगळ्या प्रकारचं शस्त्र उभारलं जातंय, तेव्हा याकडे दुर्लक्ष करणं धोकादायक ठरू शकतं.