अहमदनगर Live24 टीम, 23 मे 2021 :- महात्मा फुले कृषी विद्यापीठ, राहुरी येथील कृषी विद्या विभागांतर्गत ग्रामीण कृषी हवामान सेवा प्रकल्प कार्यरत आहे.
गेल्या वर्षभरापासून हवामानाची माहिती थेट शेतकऱ्यांपर्यंत पोचविण्यासाठी हवामान आधारित हा कृषी सल्ला व्हॉट्सअँपद्वारे देण्यात येतो, अशी माहिती महात्मा फुले कृषी विद्यापीठाच्या ग्रामीण कृषी हवामान सेवा प्रकल्पाच्या कृषी विद्या विभागातील प्रमुख डॉ. आनंद सोळंके यांनी दिली.
या प्रकल्पाद्वारे आठवड्याच्या दर मंगळवारी व शुक्रवारी जिल्ह्यातील तालुकानिहाय हवामान अंदाज व त्या आधारित कृषी सल्ला दिला जातो. कृषी सल्ला सुरूवातीला नगर जिल्ह्यातील शेतकऱ्यांकरिता असून इतर जिल्ह्यातील शेतकऱ्यांकरिता काही दिवसात त्या त्या जिल्ह्यातील प्रकल्प अधिकारी संपर्क साधणार आहेत.
दैनंदिन शेतीचे नियोजन करताना हा हवामान आधारित कृषी सल्ला शेतकऱ्यांना फार उपयुक्त ठरत आहेत. सध्या दिल्या जात असलेल्या हवामान आधारित कृषी सल्ल्यामध्ये मागील सात दिवसांच्या हवामानाचे आकडेवारी दिली जाते.
तसेच पुढील पाच दिवसांचा सविस्तर हवामानाचा अंदाज आणि हवामान आधारीत पीकनिहाय कृषी सल्ला देण्यात येतो. एम किसान या ऐपद्वारे सुमारे ५ लाख लोकांना टेक्स्ट मेसेज मिळत आहेत व व्हॉट्सअँपद्वारे सात हजार लोक यास जोडले गेलेले आहेत, अशी माहिती विभागातील कपिल शेवाळे यांनी दिली.
कृषी सल्ला मिळवा आपल्या मोबाईलवर आपल्या तालुक्याकरिताचा हवामान आधारित कृषी सल्ला आपल्या मोबाईलवर मिळविण्याकरिता शेतकऱ्यांनी केवळ ८४२१०१२१८५ हा क्रमांक सेव्ह करून यावर फक्त आपल्या तालुक्याची नावे व्हाट्सअँपद्वारे मेसेज करावा.
शेतकऱ्यास त्याच्या तालुक्याच्या ग्रुपमध्ये समाविष्ठ करण्यात येईल. व त्यास हवामान आधारित कृषी सल्ला नियमित प्राप्त होईल.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
