अहमदनगर Live24 टीम, 19 जुलै 2021 :- प्रत्येक वर्षी ५ जूनला जागतिक पर्यावरण दिवस साजरा केला जातो. हा दिवस म्हणजे सत्तरच्या दशकात सुरु झालेली संयुक्त राष्ट्राच्या इतिहासातील सर्वात मोठी जागरुकता मोहीम आहे.
वसुंधरेची चिंता असलेले, त्याची काळजी घेणारे अनेक पर्यावरणवादी घटक, संघटना, पर्यावरण प्रेमींकडून आजचा दिवस हा उत्साहाने साजरा केला जातो. आज जगासमोर हवामान बदलाचं संकट उभं आहे. दिवसेंदिवस जागतिक तापमानात वाढ होतेय, प्रदुषणाची समस्या वाढतेय.
अनेक ठिकाणची जंगले विकासाच्या नावाखाली उद्ध्वस्त केली जातात. केवळ आपल्या फायद्यासाठी पर्यावरणाच्या स्त्रोतांचा अमाप वापर केला जातो, त्याचा ऱ्हास मोठ्या प्रमाणावर केला जातो.
पृथ्वीवर आणि समुद्रातही प्लॅस्टिकचे साम्राज्य वाढलं आहे. त्यामुळे पृथ्वीवरील सर्व सजिवांचं अस्तित्वच धोक्यात आलं आहे. या संकटांपासून बचाव करण्यासाठी पर्यावरणाचे रक्षण करणे गरजेचं आहे. त्या साठी काही गोष्टींचं पालन करण गरजेच आहे.
- १) कचऱ्याबाबत व्यवस्थितपणा पाळा – गावाकडे उरलेले जेवण, शिळे, फळ-भाज्यांच्या साली इत्यादी गोष्टी जनावरांना खाण्यासाठी दिल्या जातात. ओला आणि सुका कचरा एकत्र होणार नाही, याची काळजी घेतली जाते.
तुलनेने शहरात ओला आणि सुका कचरा वेगवेगळा करण्याकडे दुर्लक्ष केलं जात आहे. स्वतःला तसंच इतरांना त्रास होऊ नये, यासाठी ओला आणि सुका कचरा ठेवण्याची सवय लावून घ्यावी.
- २) प्लास्टिकचा वापर बंद करावा प्लास्टिकच्या पिशव्या वापरण्याबाबत आपल्याकडून निष्काळजीपणा होत आहे. वेळीच ही सवय बंद करा. समजा तुम्हाला एखादे अन्नपदार्थ प्लास्टिकच्या भांड्यातून पार्सल करून मिळाल्यास त्यामध्ये छोटे रोपटे लावावे.
प्लास्टिक स्ट्रॉ ऐवजी पेपर स्ट्रॉ चा वापर करावा. दुधाची पिशवी पूर्णपणे फाडूनच फेकावी. या पिशव्या तुम्ही पूर्ण न फाडल्यास त्याच्या रीसायकल प्रक्रियेत अडथळे येऊ शकतात.
- 3) पाण्याचा एक-एक थेंब वाचवा पाणी म्हणजे जीवन. निरोगी आरोग्यासाठी स्वच्छ पाणी मिळणे अतिशय आवश्यक आहे. भविष्यात पाण्याची कमतरता भासू नये, यासाठी एक- एक थेंब पाणी वाचवणं आवश्यक आहे.
नद्यांपासून ते पाण्याचे अन्य प्रमुख स्त्रोत उदाहरणार्थ तलाव, तळे, इत्यादींमध्ये साबण, पॉलिथिन, कचरा, प्लास्टिक किंवा काचेच्या बाटल्या, पूजेचे साहित्य फेकण्याची वाईट सवय वेळीच बंद करा. दात घासताना, चेहरा धुताना पाण्याचे नळ खुले सोडू नका.
शॉवर ऐवजी बादलीमध्ये पाणी घेऊन आंघोळी करावी. सार्वजनिक ठिकाणी पाण्याचे नळ उघडे दिसल्यास बंद करावे. अशा छोट्या-छोट्या गोष्टींची काळजी घेतली तर पाण्याचा अपव्यय टाळला जाईल.
- 4) पार्टीमध्ये स्टीलच्या भांड्यांचा वापर करा प्लास्टिक, थर्माकॉल आपले आरोग्य आणि पर्यावरण दोन्हींसाठी हानिकारक आहे. या अशा वस्तू आहेत ज्या हजारो वर्षांनंतर अस्तित्वात राहतील.
यापासून आपले आणि पर्यावरणाचे संरक्षण करण्यासाठी एखाद्या कार्यक्रमामध्ये अन्नपदार्थांसाठी प्लास्टिक ऐवजी स्टीलच्या भांड्याचाच वापर करावा. तुमच्या हा छोटा प्रयत्न पर्यावरण वाचवण्यासाठी खूप मोठे पाऊल ठरू शकतो.
- 5) टॉयलेट पेपर कमी वापरा पर्यावरण ऱ्हास होऊ नये यासाठी टॉयलेट पेपर, टिशू पेपरचाही मर्यादित प्रमाणात वापर करावा.
- ६) विजेची बचत करा सूर्य प्रकाशात काम करण्याचा प्रयत्न करा. विजेची आवश्यकता नसल्यास स्विच बंद करून ठेवा.
लॅपटॉप/ मोबाइल एकदाच पूर्णतः चार्ज करा. कारण या उपकरणांसाठी जास्त प्रमाणात ऊर्जा खर्च होते. एलईडी किंवा सीएफएल बल्बचा वापर करावा.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
