Shirdi News : मराठा समाजाचे संघर्ष योद्धा मनोज जरांगे पाटील यांच्या समर्थनार्थ व आरक्षणाचे मागणीसाठी सकल मराठा समाज बांधवांच्या वतीने सोमवारी शिर्डी शहर बंदची हाक देण्यात आली होती. यास स्थानिक हॉटेल व्यवसायिक, व्यापारी, उद्योजक, छोटे-मोठे दुकानदार व नागरिकांनी उत्स्फूर्त प्रतिसाद देत शंभर टक्के बंद यशस्वी केला.
शिर्डी येथे सुरू असलेल्या साखळी उपोषणाचे आता आमरण उपोषणा मध्ये रूपांतर केले असून स्थानिक सात समाज बांधवांनी कालपासून आमरण उपोषण सुरू केले आहे. दरम्यान गाढवांच्या तोंडाला अॅड. गुणरत्न सदावर्ते यांच्या प्रतिमेचा मुखवटा बनवून त्यांची धिंड काढण्यात आली. यावेळी गुणरत्न सदावतेंच्या विरोधात घोषणाबाजी करत शासनाचाही निषेध नोंदवण्यात आला.
शिर्डीतील नगरपरीषद शेजारील पटांगणात मराठा आरक्षणासाठी गेली चार दिवसांपासून राहाता तालुका मराठा समाजा बांधवांनी साखळी उपोषण सुरू केले आहे. सरकारला जाग यावी यासाठी सोमवारी संपूर्ण दिवस शिर्डी शहर बंद ठेवण्यात आले.
येथील छोट्या मोठ्यासह सर्वच व्यावसायिकांनी मराठा आरक्षणाचे मागणीला पाठींबा देत बंदमध्ये सहभागी होत उत्स्फूर्त प्रतिसाद दिला. साई दर्शनासाठी येणाऱ्या भाविकांना कुठल्याही त्रासाला सामोरे जावे लागणार नाही.
त्यांची गैरसोय होणार नाही याची विशेष काळजी समाज बांधवांनी घेतली. त्यामुळे दर्शनाच्या बाबतीत भाविकांना त्रास झाला नाही. शहरातील हॉटेल, रेस्टॉरंट बंद असल्याने भाविकांनी साईबाबा संस्थानच्या प्रसादालयात भोजनप्रसादाचा लाभ घेतला.
तसेच काल साखळी उपोषणाच्या चौथ्या दिवशी अर्थात सोमवार दि. ३० ऑक्टोबरपासून साखळी उपोषण थांबवून सचिन नानासाहेब चौगुले, रविंद्र पांडुरंग गोंदकर, अनिल रामचंद्र बोठे, नितीन अशोक कोते, प्रकाश मच्छिंद्र गोंदकर, प्रशांत प्रकाश राहाणे, कानिफ सोपान गुंजाळ आदी सात मराठा समाज बांधवांनी आमरण उपोषण सुरू केले आहे.
काल सकाळपासून शिर्डी शहरातील धनगर समाज, मुस्लिम समाज, परीट समाजाच्या बांधवांसह निळवंडे धरण कृती समितीचे नानासाहेब शेळके, उत्तमराव घोरपडे यांनी देखील उपोषणस्थळी भेट देऊन पाठींबा दिला.
याप्रसंगी कमलाकर कोते, विजय जगताप, रमेश गोंदकर, ज्ञानेश्वर गोंदकर, सुजित गोंदकर, विजय काळे, प्रमोद गोंदकर, ताराचंद कोते, विकास गोंदकर, गणेश कोते, वैभव कोते, अभिजित कोते, संभाजीनगर येथील मराठा क्रांती मोर्चाच्या समन्वयक अॅड. सुवर्णा मोहिते, विरेश चौधरी, अॅड. अनिल शेजवळ, सुनील परदेशी, अरुण गायकवाड, पुंडलिक लावके गफ्फारखान पठाण आदीसह शेकडोंच्या संख्येने शिर्डी ग्रामस्थ उपस्थित होते.
