सॅमसंगचा आगामी Galaxy S25 सीरीज 22 जानेवारीला होणाऱ्या ‘Galaxy Unpacked’ इव्हेंटमध्ये लाँच होणार आहे. मात्र, त्याआधीच 2026 मध्ये येणाऱ्या फ्लॅगशिप Galaxy S26 सीरीजची माहिती लीक होऊ लागली आहे. विशेष म्हणजे, या सीरीजसाठी सॅमसंग नवीन बॅटरी आणि डिस्प्ले टेक्नॉलॉजी वापरणार असल्याचे समोर आले आहे. यामुळे सॅमसंगचा हा फ्लॅगशिप फोन तांत्रिकदृष्ट्या खूपच प्रगत ठरणार आहे.
Galaxy S26 सीरीजसाठी सिलिकॉन-कार्बन बॅटरीचा वापर होईल, असे प्रसिद्ध टिपस्टर आईस युनिव्हर्सने म्हटले आहे. ही टेक्नॉलॉजी पारंपरिक लीथियम-आयन बॅटरीच्या तुलनेत अधिक उर्जादक्ष आहे. सिलिकॉन-कार्बन बॅटरीमुळे फोन जास्त काळ चालेल, तसेच कमी वेळात चार्ज होईल. याशिवाय, या बॅटरी गरम होण्याची शक्यता कमी असल्याने फोन अधिक सुरक्षित असेल. यामुळे फोनच्या बॅटरीचा कार्यकाल वाढेल आणि बॅटरी क्षमता वाढवताना फोनची जाडी वाढणार नाही. परिणामी, सॅमसंगचे नवीन मॉडेल स्लिम असूनही जास्त क्षमतेच्या बॅटरीसह बाजारात येऊ शकते.
सिलिकॉन-कार्बन बॅटरीसह डिस्प्ले तंत्रज्ञानातही सॅमसंग मोठा बदल करण्याच्या तयारीत आहे. Galaxy S26 Ultra मॉडेलमध्ये ‘कलर फिल्टर ऑन तीन फिल्म एनकॅप्सूलेशन’ तंत्रज्ञानाचा वापर होणार असल्याचे लीकमधून कळाले आहे. ही टेक्नॉलॉजी सध्या सॅमसंग फोल्डेबल फोनमध्ये वापरतो. यामुळे स्क्रीनची जाडी कमी होईल, तसेच स्क्रीन अधिक ब्राइट आणि स्पष्ट दिसेल. हलक्या स्क्रीनमुळे बॅटरीचा वापर कमी होईल, ज्याचा थेट परिणाम फोनच्या कार्यक्षमतेवर होईल. या दोन मोठ्या अपग्रेड्समुळे Galaxy S26 सीरीज तांत्रिकदृष्ट्या अधिक प्रगत ठरेल.
बॅटरी आणि डिस्प्ले अपग्रेड व्यतिरिक्त, सॅमसंग Galaxy S26 सीरीजमध्ये प्रगत प्रोसेसर, सुधारित कॅमेरा आणि अत्याधुनिक सॉफ्टवेअरचा समावेश होण्याची शक्यता आहे. फोनमध्ये नवीनतम Exynos किंवा Snapdragon प्रोसेसर असू शकतो, जो गती आणि कार्यक्षमतेत जबरदस्त असेल. कॅमेरा प्रणालीमध्ये 200 मेगापिक्सलचा प्राइमरी कॅमेरा, सुधारित नाईट फोटोग्राफी, तसेच जास्त झूम क्षमतेचे फीचर्स दिले जाण्याची शक्यता आहे. सॉफ्टवेअरमध्ये Android 15 आधारित OneUI 7.0 असल्याने युजर अनुभव अधिक सहजसोप्या आणि कार्यक्षम स्वरूपात मिळू शकेल.
सॅमसंग Galaxy S26 सीरीजचे हे मोठे बदल स्मार्टफोन बाजारात क्रांती घडवू शकतात. नवीन बॅटरी तंत्रज्ञान, स्लिम डिझाइन, ब्राइट डिस्प्ले, आणि प्रगत फीचर्स यामुळे Galaxy S26 ग्राहकांना अधिक आकर्षित करू शकतो. सॅमसंगचा हा फ्लॅगशिप फोन बाजारात येईपर्यंत यासंबंधी आणखी किती नवनवीन माहिती समोर येते, हे पाहणं रोचक ठरेल.
