IRCTC Share:- भारतीय रेल्वेच्या सार्वजनिक क्षेत्रातील प्रमुख कंपनी IRCTC ने तिसऱ्या तिमाहीचे आर्थिक निकाल जाहीर केले असून कंपनीच्या नफ्यात लक्षणीय वाढ झाली आहे. ऑक्टोबर ते डिसेंबर 2024 या कालावधीत कंपनीच्या नफ्यात 13.7% वाढ झाली असून एकूण निव्वळ नफा 341 कोटी रुपये नोंदवण्यात आला आहे. मागील वर्षी याच तिमाहीत हा आकडा 300 कोटी रुपये होता.
याशिवाय कंपनीच्या महसूलातही 10% वाढ झाली असून तिसऱ्या तिमाहीत कामकाजातून मिळणारा एकूण महसूल 1224.7 कोटी रुपये इतका झाला आहे. मागील वर्षी याच कालावधीत हा महसूल 1115.05 कोटी रुपये होता. कंपनीच्या वाढत्या नफ्यात आणि महसूलात सुधारणा होत असतानाही शेअर बाजारात मात्र या स्टॉकच्या किमतीत मोठी घसरण पाहायला मिळाली.
या शेअरने गाठला 52 आठवड्यांचा निचांक
बुधवारी IRCTC चा शेअर 722.05 रुपयांपर्यंत खाली आला. जो गेल्या 52 आठवड्यांतील सर्वात कमी स्तर आहे. मात्र ब्रोकरेज फर्म Macquarie ने या स्टॉकसाठी सकारात्मक अंदाज व्यक्त केला असून 900 रुपयांचे टार्गेट सेट केले आहे.जे सध्याच्या बाजारभावाच्या तुलनेत सुमारे 25% जास्त आहे.
गेल्या वर्षभरापासूनची कामगिरी
गेल्या एका वर्षात या शेअरने 15% नकारात्मक परतावा दिला आहे, तर मागील सहा महिन्यांत 17% घसरण झाली आहे. त्यामुळे काही गुंतवणूकदारांनी चिंता व्यक्त केली असली तरी ब्रोकरेजच्या मते हा स्टॉक लवकरच रिकव्हर होऊ शकतो.
IRCTC ने जाहीर केला डिव्हिडंट
तिमाही निकालांसह, कंपनीने गुंतवणूकदारांसाठी प्रति शेअर 3 रुपये लाभांश जाहीर केला आहे. हा लाभांश 2 रुपये दर्शनी मूल्य असलेल्या शेअर्ससाठी असून यासाठी रेकॉर्ड तारीख 20 फेब्रुवारी 2025 निश्चित करण्यात आली आहे. याचा अर्थ ज्या गुंतवणूकदारांकडे या तारखेपर्यंत IRCTC चे शेअर्स असतील त्यांनाच हा लाभांश मिळेल.
गुंतवणूकदारांसाठी ठरेल संधी
IRCTC हा भारतीय रेल्वेच्या कॅटरिंग, तिकीट बुकिंग आणि टुरिझम क्षेत्रातील एक मोठा ब्रँड आहे. तिसऱ्या तिमाहीत नफा आणि महसूल वाढले असताना शेअर बाजारात या स्टॉकमध्ये घसरण झाली. मात्र ब्रोकरेजच्या मते हा स्टॉक लवकरच वर जाण्याची शक्यता आहे. दीर्घकालीन गुंतवणूकदारांसाठी हा स्टॉक चांगली संधी देऊ शकतो.
गुंतवणुकीसाठी हा शेअर योग्य आहे का?
जर तुम्ही लाँग-टर्म गुंतवणूकदार असाल तर सध्याच्या घसरणीचा फायदा घेऊन IRCTC मध्ये गुंतवणूक करणे फायदेशीर ठरू शकते. तिसऱ्या तिमाहीत कंपनीने चांगले आर्थिक निकाल दिले असून भविष्यातील योजनांमुळे ही कंपनी आणखी मजबूत होऊ शकते. तसेच ब्रोकरेज फर्मने दिलेले 25% वाढीचे टार्गेट लक्षात घेता लवकरच या शेअरमध्ये वाढ होण्याची शक्यता आहे.
