Apple च्या फोल्डेबल फोनची प्रतीक्षा करणाऱ्या चाहत्यांसाठी मोठी बातमी समोर आली आहे. अनेक महिन्यांपासून केवळ अफवा आणि लीकमध्ये दिसणारा हा फोन आता अधिकृत लॉन्चच्या दिशेने वाटचाल करत असल्याचे संकेत मिळत आहेत. अलीकडील अहवालानुसार, Apple ने त्याच्या फोल्डेबल फोनसाठी डिस्प्ले सप्लायर निश्चित करण्याची प्रक्रिया सुरू केली आहे. तसेच, हा फोन कॉम्पॅक्ट डिझाइनमध्ये उपलब्ध होण्याची शक्यता आहे.
फोल्डेबल फोनसाठी नवीन अपडेट
चीनमधील सुप्रसिद्ध टिपस्टर “डिजिटल चॅट स्टेशन” ने Apple च्या आगामी फोल्डेबल फोनबाबत मोठा खुलासा केला आहे. टिपस्टरच्या माहितीनुसार, कंपनी सध्या या फोनच्या प्रोटोटाइपची चाचणी घेत आहे. या फोनमध्ये एक कॉम्पॅक्ट बाह्य स्क्रीन आणि मध्यम आकाराचा अंतर्गत डिस्प्ले असणार आहे. त्यामुळे हा सेगमेंटमधील सर्वात लहान फोल्डेबल फोन ठरू शकतो.
फोल्डेबल iPhone च्या डिस्प्ले
टिपस्टरच्या अहवालानुसार, Apple चाचणी घेत असलेल्या प्रोटोटाइपमध्ये 5.49-इंचाचा बाह्य डिस्प्ले आणि 7.74-इंचाचा अंतर्गत डिस्प्ले असू शकतो. जर हा डिज़ाइन अंतिम स्वरूपात आला, तर Apple च्या फोल्डेबल फोनचा आकार Samsung आणि Google च्या फोल्डेबल डिव्हाइसेसपेक्षा अधिक कॉम्पॅक्ट असणार आहे. तथापि, हे स्पेसिफिकेशन्स अद्याप अंतिम नाहीत आणि Apple अंतिम उत्पादन तयार करण्याआधी अनेक प्रोटोटाइप्सची चाचणी घेऊ शकतो. त्यामुळे फोल्डेबल आयफोनच्या अधिकृत लॉन्चपर्यंत अनेक बदल होण्याची शक्यता आहे.
बुक-स्टाईल फोल्डेबल फोन असेल?
याआधीच्या अनेक रिपोर्ट्समध्ये असे नमूद करण्यात आले आहे की Apple क्लॅमशेल डिझाइनऐवजी बुक-स्टाईल फोल्डेबल फोन तयार करत आहे. याचा अर्थ असा की फोन उघडल्यानंतर टॅब्लेटसारखा दिसेल. अशा प्रकारचे डिज़ाइन अधिक प्रॉडक्टिव्हिटी आणि मल्टीटास्किंगसाठी उपयुक्त ठरू शकते.
लॉन्च आणि किंमत
Apple च्या या फोल्डेबल फोनच्या लॉन्च तारखेबाबत अद्याप कोणतीही अधिकृत घोषणा करण्यात आलेली नाही. मात्र, 2025 मध्ये हा फोन सादर होण्याची शक्यता वर्तवली जात आहे. तसेच, किंमतीबाबतही कोणतीही अधिकृत माहिती नाही, पण Apple च्या प्रीमियम उत्पादनांची किंमत पाहता, हा फोल्डेबल फोनही महागड्या श्रेणीत येऊ शकतो.
