पुणे जिल्ह्यात सध्या एकच चर्चा रंगली आहे, ती म्हणजे कुख्यात गुंड निलेश घायवळ याच्यावर हल्ला करणाऱ्या पैलवान सागर मोहोळकर याची. शुक्रवारी (११ एप्रिल २०२५) रात्री धाराशिव जिल्ह्यातील भूम तालुक्यातील आंदरूड गावात ग्रामदैवत जगदंबा देवीच्या यात्रेनिमित्त आयोजित कुस्ती स्पर्धेत हा धक्कादायक प्रकार घडला. या घटनेने निलेश घायवळसारख्या दबदबा असलेल्या गुंडाच्या विरोधात हात उगारणाऱ्या सागर मोहोळकर याचं नाव सर्वांच्या तोंडी आहे. चला, या घटनेचा आणि सागर मोहोळकर कोण याबद्दल माहिती जाणून घेऊयात.
काय घडलं आंदरूडच्या कुस्ती फडात?
आंदरूड येथील कुस्ती स्पर्धेचं आयोजन स्वतः निलेश घायवळ याने केलं होतं. शुक्रवारी रात्री कुस्ती स्पर्धा जोरात सुरू असताना निलेश घायवळ पैलवानांना भेटण्यासाठी फडात आला. यावेळी गर्दीतून वाट काढत एक तरुण पैलवान पुढे आला आणि त्याने थेट निलेश घायवळच्या कानशिलात लगावली. या अचानक झालेल्या हल्ल्याने कुस्तीच्या फडात एकच गोंधळ उडाला. निलेश घायवळचे सहकारी तातडीने त्याच्या मदतीला धावले आणि त्यांनी संबंधित पैलवानाला चोप देण्याचा प्रयत्न केला. मात्र, या गोंधळात हा तरुण पैलवान घटनास्थळावरून पळून जाण्यात यशस्वी झाला.
सागर मोहोळकर कोण आहे ?
पोलिसांनी रात्रीपासून या तरुणाचा कसून शोध घेतला आणि अखेर त्याचं नाव समोर आलं – सागर मोहोळकर. सागर हा अहिल्यानगर (अहमदनगर) जिल्ह्यातील नानज गावचा रहिवासी आहे आणि पेशाने पैलवान आहे. तो शुक्रवारी रात्री आंदरूडच्या जत्रेत आणि कुस्ती स्पर्धेत उपस्थित होता. सागरने गर्दीतून पुढे येत निलेश घायवळवर हल्ला केला, ज्यामुळे सर्वत्र खळबळ उडाली. सागर मोहोळकर याच्यावर वाशी पोलिसांनी पोलिसांसमोर हाणामारी आणि गोंधळ घालण्याच्या आरोपाखाली गुन्हा दाखल केला आहे.
हल्ल्याचं कारण काय?
सागर मोहोळकर याने निलेश घायवळवर हल्ला का केला, याचं नेमकं कारण अद्याप समोर आलेलं नाही. पोलिस याबाबत तपास करत असून, या हल्ल्यामागे वैयक्तिक वाद, स्थानिक राजकारण की अन्य काही कारण आहे, याचा शोध घेतला जात आहे. मात्र, सागर मोहोळकर याच्या धाडसामुळे त्याचं नाव पुण्यात चर्चेचा विषय बनलं आहे.
निलेश घायवळ:
निलेश घायवळ हा पुणे जिल्ह्यातील गुन्हेगारी विश्वात कुख्यात नाव आहे. त्याच्यावर खून, खुनाचा प्रयत्न, खंडणी, दरोडा, गंभीर दुखापत, दंगा आणि मारामारीसह १० हून अधिक गंभीर गुन्हे दाखल आहेत. त्याच्यावर महाराष्ट्र नियंत्रित संघटित गुन्हेगारी कायदा (MCOCA) अंतर्गतही कारवाई झाली आहे. अलीकडेच भिगवण पोलिस ठाण्यात त्याच्याविरुद्ध अपहरण आणि खंडणीचा गुन्हा दाखल झाला होता. पुण्यातील कोथरूड आणि परिसरात निलेश घायवळ आणि त्याच्या टोळीचा दबदबा आहे, आणि त्याच्याविरुद्ध अनेक वर्षांपासून पोलिस कारवाया सुरू आहेत.
सागर मोहोळकरचे अहिल्यानगर कनेक्शन
सागर मोहोळकर, हा अहिल्यानगर जिल्ह्यातील नानज गावचा रहिवासी असून तो पेशाने पैलवान आहे. शुक्रवारी आंदरूड गावात जगदंबा देवीच्या यात्रेनिमित्त पारंपरिक कुस्ती स्पर्धा आयोजित करण्यात आली होती. त्याच फडात उपस्थित असलेल्या सागरने अचानकपणे घडवलेली ही घटना खळबळजनक ठरली आहे पोलिसांनी सागर मोहोळकर याच्यावर गुन्हा दाखल केला असून, त्याचा शोध सुरू आहे. या हल्ल्यामागील कारणांचा तपास करण्यासाठी पोलिसांनी निलेश घायवळ आणि त्याच्या सहकाऱ्यांचेही जबाब नोंदवले आहेत. या प्रकरणात आणखी काही व्यक्तींचा सहभाग आहे का, याचाही शोध घेतला जात आहे.निलेश घायवळसारख्या कुख्यात गुंडावर हात उगारणारा सागर मोहोळकर हा तरुण आता चर्चेचा विषय बनला आहे. या हल्ल्याचं खरं कारण आणि त्याचे पडसाद काय असतील, हे येणारा काळच ठरवेल. पण सध्या तरी पुण्यात सागर मोहोळकर आणि निलेश घायवळ यांच्या नावाचीच चर्चा आहे.
निलेश घायवळच्या दहशतीविरुद्ध नाराजी ?
या घटनेने स्थानिक पातळीवर अनेक प्रश्न उपस्थित केले आहेत. निलेश घायवळसारख्या गुंडावर एका तरुण पैलवानाने उघडपणे हल्ला करणं हे धाडसाचं पाऊल मानलं जात आहे. काहींच्या मते, यामुळे स्थानिक तरुणांमध्ये निलेश घायवळच्या दहशतीविरुद्ध नाराजी असल्याचं दिसून येत आहे. दुसरीकडे, यामुळे श्रीगोंदा आणि धाराशिव परिसरातील राजकीय आणि सामाजिक गटांमध्येही चर्चा रंगली आहे. काहींचं म्हणणं आहे की, सागर मोहोळकर याच्या या कृतीमागे स्थानिक पातळीवरील राजकीय खेळी असू शकते.
