अहिल्यानगर- अहिल्यानगरमध्ये वीजपुरवठ्याचा लपंडाव हा कायमचा प्रश्न बनलाय. पावसाळ्यात तर वीज गायब होणं नित्याचं झालंय, पण आता उन्हाळ्यातही हीच परिस्थिती आहे. थोडा वारा सुटला किंवा हलकासा पाऊस पडला, की वीजपुरवठा खंडित होतो. गेल्या आठवड्यातच, १० एप्रिलला, केडगावमधील ३३ केव्हीच्या मुख्य लाईनमध्ये बिघाड झाला आणि सावेडी परिसरातील अनेक भाग रात्री तीन तासांपेक्षा जास्त अंधारात राहिले.
गुरुवारी सायंकाळी सात वाजता सावेडी गाव, बालिकाश्रम रोड, प्रेमदान चौक, प्रोफेसर चौक, सिव्हिल हडको, सोनानगर, कलानगर यासह अनेक भागांत वीज गायब झाली. रात्री दहानंतरच वीज परतली. यामुळे उकाडा आणि डासांच्या त्रासाने नागरिक हैराण झाले. वीज बिल नियमित भरूनही असे हाल का?, असा प्रश्न ग्राहकांना पडलेला आहे.
ग्राहकांमध्ये नाराजी
महावितरणच्या यंत्रणेत वारंवार बिघाड होत असल्याने ग्राहकांमध्ये नाराजी आहे. अनेकांनी महावितरण कार्यालयाशी संपर्क साधण्याचा प्रयत्न केला, पण कोणीच फोन उचलत नाही. “पावसाळ्यात तर हे रोजचेच आहे. थोडा पाऊस पडला, की वीज जाते. कधी खबरदारी म्हणून बंद करतात, तर कधी यंत्रणेतच बिघाड होतो,” असं सावेडीतील एका रहिवाशाने सांगितलं. गेल्या काही वर्षांत यात काहीच सुधारणा झालेली नाही. “आम्ही बिल वेळेवर भरतो, पण तरीही अंधारात राहावं लागतं. यावर कायमस्वरूपी उपाय का होत नाही?” असा प्रश्न ग्राहकांना पडलाय.
पावसाळ्यापूर्वी यंत्रणा दुरूस्ती करावी
पावसाळ्यापूर्वी महावितरणने यंत्रणा दुरुस्त करावी, वीजखांब, तारा आणि रोहित्रांची तपासणी करावी, अशी मागणी नागरिक करत आहेत. “पावसाळ्यात वीज गेली, की तासनतास वाट पाहावी लागते. यंदा तरी ठोस उपाय करा, जेणेकरून अखंडित वीज मिळेल,” अशी अपेक्षा सिव्हिल हडको परिसरातील रहिवाशांनी व्यक्त केली.
शेतीसाठी विजेचा तुटवडा
विशेषतः ग्रामीण भागात शेतकऱ्यांना कमी दाब, रोहित्र बिघाड आणि वेळेत दुरुस्ती न होण्याच्या तक्रारी आहेत. “शेतीसाठी वीज मिळत नाही, आणि मिळाली तरी दाब कमी असतो. महावितरणने याकडे लक्ष द्यावं,” असं शेतकरी सांगतात.
भारनियमनाची गरज नाही
महावितरणच्या अधिकाऱ्यांचं म्हणणं आहे, की सध्या जिल्ह्याला पुरेशी वीज मिळत आहे, त्यामुळे भारनियमनाची गरज नाही. “उन्हाळ्यात मागणी वाढली, तरच भारनियमन करावं लागतं. पण आता पुरवठा मागणीनुसार आहे,” असं एका अधिकाऱ्याने सांगितलं. पण ग्राहकांचा अनुभव वेगळा आहे. “बिल भरलं, तरी वीजपुरवठा खंडित होतो. पावसाळ्यापूर्वी यंत्रणा सुधारली, तर त्रास कमी होईल,” असं प्रोफेसर चौकातील एका व्यापाऱ्याने सांगितलं.
आता पावसाळा जवळ येतोय. महावितरणने आतापासूनच उपाययोजना कराव्यात, यंत्रणेची दुरुस्ती करावी आणि ग्राहकांना सातत्यपूर्ण वीजपुरवठा द्यावा, अशी मागणी जोर धरतेय.
