जामखेड- विधानसभा मतदारसंघात राजकीय घडामोडींनी वेग घेतला आहे. राष्ट्रवादी काँग्रेस शरदचंद्र पवार गटाचे कर्जत नगरपंचायतीतील नगरसेवक फुटल्यानंतर नगराध्यक्ष उषा राऊत यांच्याविरोधात अविश्वास प्रस्ताव दाखल झाला. या घडामोडींमागे विधान परिषदेचे सभापती राम शिंदे यांचा हात असल्याची चर्चा जोरात आहे.
याच पार्श्वभूमीवर उपमुख्यमंत्री अजित पवार यांनी नुकतीच जामखेडमध्ये सभा घेतली. या सभेच्या निमित्ताने आमदार रोहित पवार यांनी सभापती शिंदे यांच्यावर नाव न घेता खरमरीत टीका केली. “फोडाफोडीच्या व्हायरसवर अजितदादा हे निष्णात राजकीय डॉक्टर आहेत,” असा टोला त्यांनी लगावला. या वक्तव्याने स्थानिक राजकारणात खळबळ उडाली आहे.
अजित पवार यांच्या सभेतील मुद्दे
जामखेड येथे गुरुवारी रात्री झालेल्या सभेत उपमुख्यमंत्री अजित पवार यांनी कर्जत-जामखेडमधील विकासकामांवर भाष्य केलं. “या मतदारसंघात एमआयडीसी आणण्यात यश आलं नाही,” असं त्यांनी स्पष्ट केलं. हा मुद्दा पकडून रोहित पवार यांनी सभापती राम शिंदे यांच्यावर निशाणा साधला. “निवडणुकीच्या आधी एक दिवस आधी केवळ मतांसाठी शिंदे यांनी कर्जत-जामखेडसाठी ‘खांडवी-कोंभळी’ एमआयडीसी मंजूर केल्याचा दावा केला. पण अजितदादांनी सभेत स्पष्ट केलं की, एमआयडीसी आलीच नाही,” असं रोहित पवार म्हणाले. या एका वाक्याने शिंदे यांच्या दाव्याचा फुगा फुटल्याचा टोला त्यांनी लगावला.
रोहित पवारांच्या मागण्या
रोहित पवार यांनी अजित पवार यांच्याकडे मतदारसंघातील विविध विकासकामांसाठी निधीची मागणी केली. यामध्ये कर्जत-जामखेड उपजिल्हा रुग्णालय, चोंडी येथील पुण्यश्लोक अहिल्यादेवी होळकर संग्रहालय, घाट आणि कमानी, खडर्भात सद्‌गुरू संतश्री गितेबाबा आणि संत श्री सीतारामबाबा गडाच्या विकासकामांचा समावेश आहे. तसंच, मंजूर झालेल्या आणि पूर्ण झालेल्या कर्जत व जामखेडच्या एसटी डेपोंसाठी पुरेशा बस आणि मनुष्यबळाची मागणीही त्यांनी केली. पुण्यश्लोक अहिल्यादेवी होळकर यांच्या ३०० व्या जयंतीसाठी भरीव निधीची मागणी करत त्यांनी अजित पवार यांना “पुन्हा झुकते माप द्या” असं आवाहन केलं.
फोडाफोडीच्या राजकारणावर टीका
रोहित पवार यांनी सभापती राम शिंदे यांच्यावर अप्रत्यक्षपणे फोडाफोडीचं राजकारण केल्याचा आरोप केला. “महाविकास आघाडी सरकारच्या काळात मंजूर झालेला निधी अडवण्याचा, मंजूर कामं थांबवण्याचा आणि कार्यकर्त्यांना त्रास देण्याचा व्हायरस माझ्या मतदारसंघात पसरलाय. या फोडाफोडीच्या खेळात अजितदादा हेच निष्णात राजकीय डॉक्टर आहेत. ते यावर योग्य इलाज करतील,” असं त्यांनी पत्रक आणि सोशल मीडियाद्वारे सांगितलं. “मी अडवाअडवीचं राजकारण करत नाही, पण गद्दारी आणि फोडाफोडी खपवून घेणार नाही,” असंही त्यांनी ठणकावलं.
राम शिंदेंचा हात
कर्जत नगरपंचायतीतील अविश्वास प्रस्तावाच्या घडामोडींमागे सभापती शिंदे यांचा हात असल्याची चर्चा कार्यकर्त्यांमध्ये आहे. “काही नेते सत्तेसाठी फोडाफोडीचं राजकारण करताहेत. पण जनता हे सर्व पाहतेय,” असं एका स्थानिक कार्यकर्त्याने सांगितलं. रोहित पवार यांनी या मुद्द्यावर आक्रमक भूमिका घेत अजित पवार यांच्यावर विश्वास व्यक्त केला. “अजितदादा अशा खेळांना आळा घालतील आणि विकासाला प्राधान्य देतील,” असं त्यांनी सांगितलं.
