Ahilyanagar Politics: अहिल्यानगर- महापालिका, जिल्हा परिषद आणि नगरपालिका निवडणुकीची रणधुमाळी येत्या चार महिन्यांत सुरू होणार आहे. सर्वोच्च न्यायालयाच्या आदेशानंतर राजकीय पक्षांनी तयारीला वेग दिला आहे. राष्ट्रवादी काँग्रेसमध्ये फूट पडल्याने शरदचंद्र पवार आणि अजित पवार यांच्या गटांमध्ये कार्यकर्ते आणि नेते विभागले गेले आहेत. दोन्ही गटांनी निवडणुकीसाठी कंबर कसली असून, बैठका, संघटन बांधणी आणि कार्यकर्त्यांची जमवाजमव यावर जोर दिला आहे. यामुळे स्थानिक स्वराज्य संस्थांच्या निवडणुकीत काका-पुतण्यामध्ये जोरदार चुरस पाहायला मिळणार आहे.
दोन गट, दोन रणनीती
राष्ट्रवादीत फूट पडल्यानंतर अहिल्यानगर जिल्ह्यातील राजकीय समीकरणे बदलली आहेत. पूर्वी एकसंघ असलेल्या पक्षात आता दोन गट कार्यरत आहेत. अजित पवार यांनी जिल्ह्याचे उत्तर आणि दक्षिण असे दोन भाग करून प्रत्येकासाठी स्वतंत्र जिल्हाध्यक्ष नेमले आहेत. उत्तर जिल्ह्यासाठी अशोक सावंत आणि दक्षिणेसाठी कपिल पवार यांच्यावर जबाबदारी सोपवली आहे. दोन्ही नेत्यांनी आपापल्या भागात कार्यकारिणी स्थापन केल्या आहेत. तालुकास्तरावर अध्यक्ष, ओबीसी सेल, महिला आघाडी, युवक-युवती संघटना आणि सामाजिक न्याय विभाग अशा विविध आघाड्यांचे पदाधिकारी नेमले आहेत. सभासद नोंदणीही जोरात सुरू आहे. अशोक सावंत यांनी ७० जणांची, तर कपिल पवार यांनी १२३ जणांची कार्यकारिणी उभी केली आहे.
दुसरीकडे, शरदचंद्र पवार यांच्या पक्षाचे जिल्हाध्यक्ष राजेंद्र फाळके यांनीही तयारीला गती दिली आहे. त्यांनी ७२ जणांची मजबूत कार्यकारिणी स्थापन केली असून, उपाध्यक्ष, सरचिटणीस, संघटक यांच्यासह तालुकास्तरावरही नेमणुका केल्या आहेत. फाळके यांनी गत विधानसभा निवडणुकीत पक्षाला यश मिळवून दिले होते. आता ते स्थानिक निवडणुकीत अजित पवार गटाला टक्कर देण्यासाठी रणनीती आखत आहेत. मुंबईत वरिष्ठ नेत्यांच्या बैठका सुरू असून, फाळके तिथेही सक्रिय आहेत.
स्थानिक निवडणुकीत कार्यकर्त्यांचा कस
स्थानिक स्वराज्य संस्थांच्या निवडणुका या कार्यकर्त्यांच्या जोरावर लढल्या जातात. ज्या पक्षाकडे कार्यकर्त्यांचा मोठा संच आणि चांगली संघटना आहे, तो पक्ष बाजी मारतो. अहिल्यानगर जिल्ह्यात राष्ट्रवादीचे वर्चस्व कायम आहे. मात्र, फुटीमुळे दोन्ही गटांना आपली ताकद दाखवण्याची संधी आहे. अजित पवार गटाकडे उपमुख्यमंत्रिपदाचा करिष्मा आणि सत्तेची ताकद आहे, तर शरद पवार गटाकडे अनुभवी नेते आणि कार्यकर्त्यांचा उत्साह आहे. दोन्ही गटांनी तालुकास्तरापर्यंत संघटना बांधणी केली असून, कार्यकर्त्यांना एकत्र ठेवण्यासाठी बैठका आणि मेळाव्यांचा धडाका लावला आहे.
कुणाची सरशी?
राष्ट्रवादीच्या दोन्ही गटांमध्ये चुरस वाढली असली, तरी निवडणुकीत कोण बाजी मारणार, हे कार्यकर्त्यांची एकजूट आणि नेतृत्वाची रणनीती ठरवेल. शरद पवार गटाचे राजेंद्र फाळके यांचा अनुभव आणि अजित पवार गटाचे सत्तेचे बळ यामुळे ही लढत रंगतदार होणार आहे. कार्यकर्त्यांमध्येही काही ठिकाणी नाराजी आहे, कारण फुटीमुळे त्यांना एका गटाची बाजू घ्यावी लागली. तरीही दोन्ही गट निवडणुकीसाठी सज्ज झाले आहेत.
