Ahilyanagar Politics: कोपरगाव- काकडी गावात राजकीय समीकरणे बदलताना दिसत आहेत. कोल्हे गटाचे कट्टर समर्थक आणि काकडीच्या विद्यमान सरपंच सौ. पूर्वा गुंजाळ यांनी आपल्या कार्यकर्त्यांसह आमदार आशुतोष काळे यांच्या नेतृत्वाखालील राष्ट्रवादी काँग्रेस पक्षात प्रवेश केला आहे. यामुळे कोल्हे गटाला मोठा धक्का बसला आहे.
आ. काळे यांनी सरपंच गुंजाळ आणि त्यांच्या सहकाऱ्यांचे पक्षात स्वागत केले. सरपंच गुंजाळ यांनी सांगितले की, गावाच्या विकासासाठी आ. काळे यांचे मोलाचे सहकार्य लाभले आहे, आणि यापुढेही काकडीचा सर्वांगीण विकास व्हावा यासाठी त्यांनी हा निर्णय घेतला. या प्रवेशामुळे काकडीतील राजकीय गटबाजी आणि विकासाच्या मुद्द्यावर नव्याने चर्चा सुरू झाली आहे.
कोल्हे गटाला धक्का आणि काळे गटाचा वाढता प्रभाव
काकडी गावात कोल्हे गटाचा दबदबा राहिला असला, तरी सरपंच सौ. पूर्वा गुंजाळ आणि कोल्हे गटाचे कट्टर कार्यकर्ते कानिफनाथ गुंजाळ यांचा राष्ट्रवादी काँग्रेसमधील प्रवेश हा कोल्हे गटासाठी मोठा धक्का मानला जात आहे. या प्रवेशामुळे काळे गटाचा प्रभाव काकडीत वाढला आहे. सरपंच गुंजाळ यांच्यासह ग्रामपंचायत सदस्य बाळासाहेब मोरे, अशोक सोनवणे, चंद्रकला सोनवणे, साखर सोनवणे, गजानन सोनवणे, रविंद्र गुंजाळ आणि इतर कार्यकर्त्यांनी राष्ट्रवादीत प्रवेश केला. यावेळी प्रभाकर गुंजाळ आणि नंदकिशोर औताडे यांची उपस्थिती लक्षणीय होती.
आ. आशुतोष काळे यांचे विकासकामे
सरपंच सौ. पूर्वा गुंजाळ यांनी पक्षप्रवेशाच्या वेळी आ. आशुतोष काळे यांच्या विकासकामांचा उल्लेख केला. त्यांनी सांगितले की, काकडी गावातील पाणीपुरवठा योजना, गावातील रस्ते, शाळांच्या खोल्या, वीज रोहित्र आणि गावातील वेस यासारख्या मूलभूत सुविधांसाठी काळे यांनी आमदार निधीतून मोठी मदत केली. याशिवाय, विमानतळ प्रकल्पाच्या माध्यमातून गावाच्या समस्यांचे निराकरण करण्यातही त्यांचे योगदान मोलाचे राहिले आहे. सरपंच गुंजाळ यांनी आपल्या सरपंचपदाच्या काळात काळे यांच्याकडून मिळालेल्या सहकार्यामुळे गावाच्या विकासाला गती मिळाल्याचे नमूद केले. या सहकार्यामुळे आणि भविष्यातील विकासाच्या दृष्टीने त्यांनी कार्यकर्त्यांसह राष्ट्रवादीत प्रवेश करण्याचा निर्णय घेतला.
