Jainik Power IPO:- आज शेअर बाजारात जैनिक पॉवर अँड केबल्स या नव्या कंपनीच्या लिस्टिंगमुळे काहीसा गोंधळ पाहायला मिळाला. गुंतवणूकदारांना या लिस्टिंगकडून मोठी अपेक्षा होती, मात्र प्रत्यक्षात काहीसं निराशाजनक चित्र उभं राहिलं. शेअर बाजारात नव्या कंपनीची सुरुवात जशी झाली, तशी ती गुंतवणूकदारांच्या मनात प्रश्नचिन्हं निर्माण करणारी ठरली.
जैनिक पॉवर अँड केबल्सचे शेअर्सने केली निराशा
एनएसईच्या एसएमई प्लॅटफॉर्मवर जैनिक पॉवर अँड केबल्सचे शेअर्स मंगळवारी ₹८२ या किमतीवर सूचीबद्ध झाले. ही किंमत त्यांच्या ₹११० च्या आयपीओ प्राइसपेक्षा थेट २५ टक्क्यांनी कमी होती. लिस्टिंगनंतर शेअर थोडं सावरताना दिसला आणि ₹८६.१० पर्यंत पोहोचला, पण तरीही अनेक गुंतवणूकदारांच्या अपेक्षांना हे उत्तर नव्हतं. ज्यांनी ₹१.३२ लाख इतकी किमान गुंतवणूक केली होती, त्यांना पहिल्याच दिवशी तोटा सहन करावा लागला.
या कंपनीचा ₹५१.२० कोटींचा आयपीओ १० ते १२ जूनदरम्यान खुला होता. पण या तीन दिवसांत फक्त १.५४ पटच सबस्क्राइब झाला, म्हणजे फारशी जोरदार मागणी नव्हती. किरकोळ गुंतवणूकदारांनी अधिक उत्साह दाखवला आणि त्यांच्याकडून २.०८ पट मागणी झाली, पण इतर विभागांचा प्रतिसाद सौम्य राहिला. संस्थात्मक गुंतवणूकदारांकडून केवळ १.०१ पट प्रतिसाद मिळाला, जे दर्शवतं की मोठे खेळाडू फारसे आकर्षित झाले नाहीत.
या कंपनीचा व्यवसाय काय आहे?
कंपनीचा व्यवसाय पॉवर आणि केबल उत्पादनाशी संबंधित आहे. त्यांचा हा आयपीओ संपूर्णपणे नवीन शेअर्सचा होता म्हणजेच कंपनीने पहिल्यांदाच बाजारातून भांडवल उभारलं. यात कोणतीही विक्रीसाठी ऑफर नव्हती, म्हणजे आधीचे गुंतवणूकदार शेअर्स विकत नव्हते, ही रक्कम थेट कंपनीच्या तिजोरीत जाणार होती. हे पैसे कंपनी कार्यरत भांडवल, नवीन उत्पादन सुविधा, काही कर्जफेड आणि कॉर्पोरेट गरजांसाठी वापरणार आहे.
या सार्वजनिक इश्यूची जबाबदारी फास्ट ट्रॅक फिनसेक प्रायव्हेट लिमिटेडकडे होती, तर स्कायलाइन फायनान्शियल सर्व्हिसेस प्रायव्हेट लिमिटेडने रजिस्ट्रार म्हणून काम पाहिलं. बाजारात शेअरची पुरेशी खरेदी-विक्री (तरलता) टिकून राहावी यासाठी रिखव सिक्युरिटीज लिमिटेडला ‘मार्केट मेकर’ म्हणून नेमण्यात आलं.
जैनिक पॉवरची ही लिस्टिंग गुंतवणूकदारांसाठी एक धडा ठरली आहे.प्रत्येक आयपीओ संधी असतेच असं नाही. कंपनीची वाटचाल कशी होते, ते पाहणं महत्त्वाचं ठरेल. सध्या तरी गुंतवणूकदार सावधपणेच पुढे जातील, असं चित्र आहे.
