Erisinfra IPO:- शेअर बाजारात आज एक नव्या संधीची चाहूल लागली आहे. एरिसइन्फ्रा सोल्युशन्स नावाची कंपनी १८ जूनपासून आपला प्राथमिक समभाग विक्रीचा (IPO) प्रस्ताव घेऊन येत आहे. गुंतवणूकदारांमध्ये या आयपीओबाबत उत्सुकता आहे, कारण ग्रे मार्केटमध्ये या शेअरवर आधीच २५ रुपयांचा प्रीमियम मिळत आहे. त्यामुळे लिस्टिंगच्या दिवशी या शेअरला चांगला प्रतिसाद मिळण्याची शक्यता वर्तवली जात आहे.
या आयपीओची लॉट साईज काय?
या आयपीओसाठी प्रति शेअर किंमत पट्टा २१० ते २२२ रुपये इतका निश्चित करण्यात आला आहे. एरिसइन्फ्राचा आयपीओ १८ जूनपासून सुरू होणार असून २० जून रोजी बंद होईल. त्याआधी अँकर गुंतवणूकदारांसाठी आजपासूनच इश्यू खुला झाला आहे. कंपनीच्या माहितीप्रमाणे, एक लॉट ६७ शेअर्सचा असेल आणि त्यानंतरही ६७च्या पटीतच गुंतवणूक करता येणार आहे.
ग्रे मार्केटमधील सध्याचा दर काय?
एरिसइन्फ्राचा ग्रे मार्केटमधील सध्याचा दर पाहता, अंदाजे लिस्टिंग किंमत २४७ रुपये इतकी होऊ शकते, जी IPO च्या वरच्या बेंचमार्क किंमतीपेक्षा जवळपास ११ टक्क्यांनी अधिक आहे. या संभाव्य नफ्यामुळे किरकोळ गुंतवणूकदारही या आयपीओकडे आकर्षित होताना दिसत आहेत.
या इश्यूमधून कंपनी तब्बल ₹४९९.६० कोटींचं भांडवल उभारणार आहे. हे पूर्णपणे नवीन समभाग विक्रीद्वारे केले जाणार असून, यामध्ये कोणताही विक्रीसाठीचा (OFS) भाग समाविष्ट नाही. उभारण्यात येणारं भांडवल कंपनी कर्जमुक्त होण्यासाठी, कामकाजासाठी लागणाऱ्या भांडवली गरजांकरिता, उपकंपनीत गुंतवणुकीसाठी आणि अन्य कॉर्पोरेट उद्दिष्टांसाठी वापरण्याचा मानस आहे.
एरिसइन्फ्रा सोल्युशन्स ही कंपनी काय काम करते?
एरिसइन्फ्रा सोल्युशन्स ही कंपनी तंत्रज्ञानावर आधारित आहे आणि ती बांधकाम साहित्याच्या B2B विक्री क्षेत्रात काम करते. तिचं काम खरेदी प्रक्रियेला सुलभ व डिजिटल बनवण्यावर केंद्रित आहे. कंपनी जीआय पाईप्स, एमएस वायर्स, टीएमटी बार्स, बल्क सिमेंट अशा विविध उत्पादनांचं वितरण करते. २०२१ ते २०२४ या कालावधीत कंपनीने ९६३ पिनकोडमध्ये २,१३३ ग्राहकांना सेवा दिली आहे. मुंबई, बेंगळुरू आणि चेन्नईसारख्या शहरांतून त्यांनी १०.३५ दशलक्ष मेट्रिक टन बांधकाम साहित्य वितरित केलं आहे.
या कंपनीचे ग्राहकही मोठ्या प्रमाणावर नावाजलेले आहेत.ज्यात कॅपेसाइट इन्फ्राप्रोजेक्ट्स, जे कुमार, अफकॉन्स, ईएमएस लिमिटेड यांचा समावेश आहे. त्यामुळे कंपनीचा उद्योग क्षेत्रातील दर्जा आणि कार्यक्षमता स्पष्ट होते.
एरिसइन्फ्राचा हा IPO त्यांच्या व्यवसाय विस्ताराचा एक महत्त्वाचा टप्पा ठरू शकतो. गुंतवणूकदारांनी मात्र बाजारातील जोखीम लक्षात घेऊनच गुंतवणुकीचा निर्णय घ्यावा. पण सध्या तरी, या आयपीओभोवती उत्साहाचे वातावरण नक्कीच आहे.
