Tata Motors Share:- शुक्रवारी शेअर बाजारात थोडीशी चैतन्याची चाहूल लागली होती आणि त्यात टाटा मोटर्स या बहुचर्चित कंपनीनेही थोडा दिलासा दिला. गेल्या काही महिन्यांपासून सतत दबावाखाली असलेला हा शेअर शेवटी काहीसा सावरताना दिसला. बीएसईवर हा शेअर ०.५८ टक्क्यांनी वाढून ६७६.१० रुपयांवर बंद झाला. जरी ही वाढ खूप मोठी नसेल, तरी बाजारात याचा एक सकारात्मक संकेत मानला जातो.
प्रसिद्ध ब्रोकरेजने दिली महत्त्वाची माहिती
पण खरी चर्चा झाली ती टाटा मोटर्सविषयी ब्रोकरेज हाऊस बीएनपी परिबास सिक्युरिटीजने दिलेल्या मतामुळे. त्यांनी स्पष्टपणे सांगितले की टाटा मोटर्सच्या शेअर्समध्ये अजून भरपूर वाव आहे आणि त्यांनी या शेअरला “आउटपरफॉर्म” रेटिंग दिलंय. म्हणजे, बाजारातल्या इतर कंपन्यांच्या तुलनेत हा शेअर चांगली कामगिरी करू शकतो, असं त्यांचं म्हणणं आहे. त्यांनी त्याची टार्गेट किंमतही ठरवली असून ती तब्बल ८३० रुपये प्रति शेअर. म्हणजे, सध्याच्या दरापेक्षा सुमारे २० टक्क्यांनी जास्त.
या अंदाजामागचं कारणही तितकंच विचारात घेण्याजोगं आहे. टाटा मोटर्सने गेल्या काही वर्षांत आपली रणनीती मोठ्या प्रमाणावर बदलली आहे. त्यांचं लक्ष सध्या दोन मुख्य गोष्टींवर आहे. त्यातील एक म्हणजे प्रवासी वाहनांचा बाजार आणि दुसरं म्हणजे इलेक्ट्रिक वाहने. प्रवासी वाहनांच्या विभागात त्यांचा बाजार हिस्सा वाढवण्यासाठी कंपनीने अनेक नव्या मॉडेल्स लाँच केली आहेत. दुसरीकडे, इलेक्ट्रिक वाहनांच्या (EV) क्षेत्रात टाटा मोटर्सचा वेग खूपच वेगवान आहे.
टाटा ग्रुपचे अध्यक्ष एन. चंद्रशेखरन यांचा विश्वास आहे की कंपनी २०३० पर्यंत EV सेगमेंटसाठी निश्चित केलेले उद्दिष्ट गाठेल. सध्या कंपनीच्या एकूण विक्रीपैकी सुमारे १५ टक्के विक्री इलेक्ट्रिक गाड्यांमधून येते, हे लक्षात घेतल्यास हा आकडा लक्षणीय आहे. विशेष म्हणजे, टाटा मोटर्स या बाबतीत आपल्या प्रमुख प्रतिस्पर्ध्यांपेक्षा म्हणजेच हुंडई आणि मारुतीपेक्षा आघाडीवर असल्याचं मानलं जातं.
पण हे सगळं असूनही शेअर मार्केटमध्ये गेल्या वर्षभरात टाटा मोटर्सचा शेअर तब्बल ३० टक्क्यांनी खाली घसरलेला आहे. ही घसरण पाहता अनेक गुंतवणूकदार चिंतेत असले तरी, काही तज्ञ मात्र यालाच एक संधी मानत आहेत. कारण कंपनीची दीर्घकालीन धोरणं आणि बाजारातील स्थिती पाहता, पुढील काळात या शेअरमध्ये चांगली उडी येऊ शकते.
तुलना करता, टाटा मोटर्सने गेल्या दोन वर्षांत सुमारे १६ टक्के परतावा दिला, तर त्याच कालावधीत सेन्सेक्सने ३० टक्क्यांची भरारी घेतली आहे. त्यामुळे टाटा मोटर्सचा शेअर सध्या मागे पडलेला असला, तरी त्यात गुंतवणुकीसाठी अजूनही भरपूर जागा आहे, असं ब्रोकरेज हाऊसेसचं मत आहे.
