Low Price Stocks :- शेअर बाजारात गेले काही दिवस सावध पावले टाकत असलेल्या गुंतवणूकदारांना अखेर शुक्रवारी काहीसा दिलासा मिळाला.आठवडाभराच्या सावध वातावरणानंतर शेवटच्या दिवशी बाजारात दमदार तेजी पाहायला मिळाली. निफ्टी आणि सेन्सेक्स या दोन्ही प्रमुख निर्देशांकांनी जवळपास दीड टक्क्यांची उडी घेतली आणि बाजाराचा मूड एका झटक्यात बदलून गेला. विशेष म्हणजे, इस्रायल-इराण तणाव आणि जागतिक अस्थिरतेच्या पार्श्वभूमीवर सुद्धा भारतीय बाजाराने स्वतःचा तोल सावरत सकारात्मक चित्र रंगवलं.
शुक्रवारी सेन्सेक्स तब्बल १,०४६ अंकांनी उडी मारून ८२,४०८ वर बंद झाला. निफ्टीनेही त्याच जोमात ३१९ अंकांची भरारी घेतली आणि २५,११२ च्या पातळीवर पोहोचला. बँकिंग क्षेत्रासाठीही हा दिवस चांगला ठरला. बँक निफ्टीने ६७५ अंकांची भर घालून ५६,२५२ चा टप्पा गाठला. म्हणजेच, गुंतवणूकदारांनी ‘शॉर्ट कव्हरिंग’ करत बाजाराला वर खेचलं आणि साप्ताहिक सत्राचा शेवट उत्साही केला.
संपूर्ण आठवड्यात कसं राहिले बाजाराचे चित्र?
गेल्या संपूर्ण आठवड्याचा विचार केला तर, निफ्टी आणि सेन्सेक्स दोघेही सुमारे १.५९ टक्क्यांनी वधारले. बँक निफ्टीनेही १.३१ टक्क्यांची घसघशीत वाढ नोंदवली. मात्र, या सगळ्याच्या पार्श्वभूमीवर आनंद राठी या ब्रोकरेज फर्मचे मेहुल कोठारी यांचं विश्लेषण लक्षवेधी ठरतं. त्यांच्या मते, निफ्टी सध्या एक महत्त्वाच्या टप्प्यावर उभा आहे. २५,३०० च्या वर जाईल, तर तेजीचा पुढचा टप्पा सुरू होईल. नाहीतर, पुन्हा एकदा बाजार मागे वळण्याची शक्यता नाकारता येत नाही.
ते स्पष्ट सांगतात की, “२४,७०० हा निफ्टीसाठी तात्पुरता आधार आहे आणि जर बाजारात कमकुवतपणाचे लक्षण दिसले तर सावध राहणं महत्त्वाचं आहे. अजून विक्रीचे ठोस संकेत नाहीत, पण निफ्टी जर २५,३०० पार केला, तर २५,५०० पर्यंतच्या स्तरांची अपेक्षा ठेवता येईल.” यामुळं ट्रेडर्ससाठी सध्या घाई करून निर्णय घेण्यापेक्षा योग्य संकेतांची वाट पाहणं हेच धोरण योग्य ठरेल.
बँक निफ्टीकडे पाहिलं तर, सत्रभरात फारशी दिशा स्पष्ट नव्हती. हलकीफुलकी हालचाल होती, पण निर्णायक तेजीचा अभाव दिसून आला. ५७,००० चा टप्पा पार होईपर्यंत काही मोठा ब्रेकआउट मिळण्याची शक्यता कमीच आहे. कोठारी यांचं मत आहे की बँक निफ्टी अजून काही काळ विस्तृत एकत्रीकरणाच्या टप्प्यातच राहील. म्हणजेच, सध्या मोठे निर्णय घ्यायला वेळ आहे.
मेहुल कोठारी यांनी सुचवलेले शेअर्स
शेअर निवडीच्या बाबतीत त्यांनी अशा तीन स्टॉक्सवर लक्ष ठेवायला सांगितलं आहे, जे सध्या ₹१०० च्या खाली उपलब्ध आहेत आणि त्यात काही संभाव्यता आहे. येस बँकचा शेअर ₹१९.७३ वर खरेदी करता येईल, लक्ष्य ₹२०.७५ ठेवण्यात आलं आहे. सुझलॉन एनर्जी ₹६३ च्या आसपास खरेदीसाठी योग्य असून, लक्ष्य ₹६६.५० आहे आणि तिसरा शेअर आदित्य बिर्ला फॅशन अँड रिटेल हा शेअर्स असून तो ₹७३ वर घ्यावा, ज्याचं लक्ष्य ₹७८ पर्यंत आहे. अर्थात, प्रत्येक स्टॉक्ससाठी त्यांनी स्टॉप लॉसचीही स्पष्ट मर्यादा दिली आहे. म्हणजेच तोट्याचं नियंत्रण ठेवण्यासाठी सजग राहण्याचं सुचवलेलं आहे.
