Ola Electric Share Price:- आजच्या शेअर बाजारात एक ठळक घडामोड घडली व ती म्हणजे ओला इलेक्ट्रिक या इलेक्ट्रिक वाहननिर्मात्या कंपनीचे शेअर्स बाजारात गडगडले. तब्बल ६ टक्क्यांहून अधिक घसरण होत या शेअरची किंमत ५२ आठवड्यांच्या नीचांकी स्तरावर पोहोचली. त्यामुळे गुंतवणूकदारांमध्ये अस्वस्थता वाढली आहे आणि कंपनीसमोरील आर्थिक अडचणी पुन्हा एकदा चर्चेत आल्या आहेत.
या घसरणीमागील प्रमुख कारणे
२३ जून रोजी ओला इलेक्ट्रिक मोबिलिटी लिमिटेडचे जवळपास २.४१ कोटी शेअर्स खरेदी-विक्री झाले. हे शेअर्स सरासरी ४४ रुपये दराने हाताळले गेले. ही व्यवहाराची रक्कम पाहता, खरेदीदार आणि विक्रेत्याचे नाव अद्याप जाहीर करण्यात आलेले नाही, पण इतक्या मोठ्या प्रमाणात शेअर्सची हालचाल ही नक्कीच लक्षवेधी आहे. दिवसाच्या सुरुवातीला शेअर ४५.३७ रुपयांवर उघडला आणि दुपारपर्यंत ४३.२० रुपयांवर येऊन थांबला. यामुळे या शेअरने त्याचा ५२ आठवड्यांतील सर्वात निचांकी दर गाठला.
हे पहिल्यांदाच घडलेले नाही. याआधीही, जून महिन्याच्या सुरुवातीला तब्बल १४.२२ कोटी शेअर्सचा मोठा व्यवहार झाला होता. त्यावेळी प्रति शेअर दर होता सुमारे ५१.४० रुपये आणि एकूण व्यवहार ७३१ कोटी रुपयांचा. त्यामुळे बाजारात पुन्हा एकदा प्रश्न निर्माण झाला आहे की, मोठे गुंतवणूकदार कंपनीमधून बाहेर पडण्याचा विचार करत आहेत का?
या घसरणीमागे केवळ शेअर व्यवहारच नाही, तर कंपनीची आर्थिक स्थितीही मोठ्या प्रमाणावर जबाबदार आहे. मार्च २०२५ च्या तिमाहीत ओला इलेक्ट्रिकला मोठा आर्थिक फटका बसला. कंपनीच्या महसुलात तब्बल ६२ टक्क्यांची घसरण झाली आहे आणि नफ्याऐवजी तोट्यात वाढ झाली. ही आकडेवारी पाहता कंपनीला बाजारात टिकून राहण्यासाठी अजून खूप मेहनत घ्यावी लागणार आहे.
या सगळ्याचा आणखी एक महत्त्वाचा पैलू म्हणजे कंपनीचा आयपीओ. ऑगस्ट २०२४ मध्ये आलेल्या या आयपीओचा प्राइस बँड ७६ रुपये होता. पण सध्या बाजारात हा शेअर ४३ रुपयांपर्यंत खाली आला आहे. म्हणजेच, ज्या गुंतवणूकदारांनी आयपीओमध्ये पैसे लावले, त्यांना सध्या जवळपास ४३ टक्क्यांचा तोटा सहन करावा लागतोय. कर्मचाऱ्यांसाठी विशेष सूट देऊन कंपनीने प्रति शेअर ७० रुपयांपेक्षा कमी दरात समभाग दिला होता, तरीदेखील सध्याची परिस्थिती फारशी उत्साहवर्धक नाही.
