भारतीय संघ आज दक्षिण आफ्रिकेत शेवटचा सामना खेळत आहे. हा दौरा संपल्यानंतर टीम इंडियाला आपला नवा कसोटी कर्णधार मिळू शकतो. दक्षिण आफ्रिका मालिकेतील पराभवानंतर विराट कोहलीने कसोटी कर्णधारपदाचा त्याग केल्याने रोहित शर्मा आता नवा कसोटी कर्णधार होण्यासाठी सज्ज झाला आहे.
रोहित शर्मा सध्या टी-२० आणि वनडे फॉरमॅटमध्ये कर्णधार आहे, त्यामुळे आता कसोटीचे कर्णधारपदही त्याच्या खात्यात जाताना दिसत आहे.बीसीसीआयच्या अधिकाऱ्याने इनसाइडस्पोर्टला सांगितले की, रोहित शर्मा टीम इंडियाचा नवा कसोटी कर्णधार असेल यात शंका नाही.
दक्षिण आफ्रिका मालिकेसाठी रोहित शर्माला उपकर्णधार बनवण्यात आले होते, त्यामुळे तो आता कर्णधारपदी विराजमान होणार होता. लवकरच त्याची अधिकृत घोषणाही केली जाईल.
बीसीसीआयच्या अधिकाऱ्याच्या म्हणण्यानुसार, रोहित शर्मासमोर आता कामाचा ताण हे मोठे आव्हान असेल. अशा परिस्थितीत त्याला स्वत:ला तंदुरुस्त ठेवावे लागेल, निवडकर्ते याबाबत रोहितशीही बोलतील.
उपकर्णधार निवडीवरही होणार विचारमंथन!
विराट कोहलीने T20 विश्वचषकानंतर कर्णधारपद सोडले तेव्हा रोहित शर्माला पहिल्या T20 चे कर्णधार बनवण्यात आले होते. त्यानंतर दक्षिण आफ्रिका दौऱ्यापूर्वी निवडकर्त्यांनी विराट कोहलीकडून वनडेचे कर्णधारपद परत घेतले आणि त्यानंतर रोहित शर्माला वनडेचे कर्णधार बनवले.
आता विराट कोहलीने स्वतः कसोटीचे कर्णधारपद सोडले असून, रोहित शर्मा नवा कसोटी कर्णधार होण्याच्या मार्गावर आहे. तसे, निवडकर्त्यांसमोरचे सर्वात मोठे आव्हान आता उपकर्णधार निवडण्याचे असेल, कारण उपकर्णधारच भविष्याचा कर्णधार होऊ शकतो.
या शर्यतीत केएल राहुल, ऋषभ पंत आणि जसप्रीत बुमराहसारखे खेळाडू आघाडीवर आहेत. दक्षिण आफ्रिका दौऱ्यावरही केएल राहुल रोहित शर्माच्या अनुपस्थितीत कर्णधार आहे, तर जसप्रीत बुमराह उपकर्णधार आहे.
