संगमनेर सहकारी साखर कारखाना हा ऊस उत्पादक शेतकरी आणि सभासदांचा मालकीचा असून, सध्या काही जण त्याचा कारभार खासगी मालमत्तेप्रमाणे चालवत असल्याचा आरोप आमदार अमोल खताळ यांनी केला आहे. सभासदांच्या बैठकीत त्यांनी या परिस्थितीला आळा घालण्यासाठी आणि कारखाना पुन्हा शेतकऱ्यांच्या ताब्यात आणण्यासाठी निवडणूक पूर्ण ताकदीनिशी लढविण्याची घोषणा केली.
ऊस उत्पादकांसाठी निर्णायक निवडणूक
आमदार खताळ यांनी स्पष्ट केले की, हा कारखाना केवळ काही लोकांच्या ताब्यात राहू शकत नाही. हा शेतकऱ्यांच्या मालकीचा असून तो पुन्हा त्यांच्या हातात देण्यासाठी या निवडणुकीत पूर्ण ताकदीनिशी लढाई लढली जाणार आहे. त्यांनी सभासदांना आवाहन केले की, ही निवडणूक केवळ लढवायची नाही, तर जिंकायची आहे. यासाठी प्रत्येक मतदार सभासदापर्यंत पोहोचून विश्वास निर्माण करण्याचे काम करावे. इच्छुक उमेदवारांची मोठी संख्या असून, आणखी काही जण इच्छुक असतील, तर त्यांनी लवकरात लवकर आपली नावे नोंदवावी.
पारदर्शक निवडणुकीचा निर्धार
आमदार खताळ यांनी निवडणुकीदरम्यान कारखान्याच्या यंत्रणेचा गैरवापर होणार नाही, यासाठी प्रशासनाला स्पष्ट सूचना देण्याचा निर्धार व्यक्त केला. पारदर्शक प्रक्रियेने निवडणूक पार पडावी यासाठी खबरदारी घेण्याची गरज असल्याचे त्यांनी सांगितले.
सत्ता परिवर्तन पॅनलच्या नेतृत्वाखाली निवडणूक
ज्येष्ठ नेते वसंत गुंजाळ यांनी स्पष्ट केले की, ही निवडणूक महायुतीच्या बॅनरखाली न लढवता “शेतकरी सत्ता परिवर्तन पॅनल” या बॅनरखाली लढवली जाणार आहे. यामुळे ऊस उत्पादक शेतकरी आणि सभासदांचीच खरी सत्ता प्रस्थापित करण्याचा निर्धार त्यांनी व्यक्त केला.
सभासदांची एकजूट
या बैठकीस ज्येष्ठ नेते वसंत गुंजाळ, दादाभाऊ गुंजाळ, भाजप तालुकाध्यक्ष वैभव लांडगे, शेतकरी नेते संतोष रोहोम, शिवसेनेचे उपजिल्हाप्रमुख विठ्ठल घोरपडे, तालुकाप्रमुख रमेश काळे, भाजप सरचिटणीस रोहिदास साबळे, संघर्ष सामाजिक संस्थेचे अध्यक्ष अ‍ॅड. संग्राम जोंधळे, गोरक्ष कापकर आणि बापूसाहेब देशमुख यांच्यासह अनेक ऊस उत्पादक सभासद उपस्थित होते.
