Ahilyanagar news : श्रीगोंदा मतदारसंघाचे विद्यमान आमदार आणि साईकृपा शुगर अँड अलाईड लिमिटेड, हिरडगाव येथील माजी अध्यक्ष आ. विक्रमसिंह बबनराव पाचपुते यांच्यासह कारखान्याच्या व्यवस्थापकावर श्रीरामपूर न्यायालयाने कठोर कारवाई केली आहे.
श्रीरामपूरमधील अशोक सहकारी साखर कारखान्याला दिलेल्या २० लाख रुपयांच्या धनादेश अनादर प्रकरणी श्रीरामपूरच्या न्यायदंडाधिकारी (क्रमांक दोन) न्यायालयाने त्यांच्याविरुद्ध पकड वॉरंट जारी केले आहे.
या प्रकरणात श्रीगोंदा पोलिसांना दोघांना ताब्यात घेऊन न्यायालयात हजर करण्याचे आदेश देण्यात आले आहेत. मात्र, श्रीगोंदा पोलिसांकडून वॉरंटची अंमलबजावणी होत नसल्याने आ. पाचपुते आणि व्यवस्थापक न्यायालयात हजर राहिले नसल्याचे समोर आले आहे.
अशोक सहकारी साखर कारखान्याला साईकृपा शुगर अँड अलाईड लिमिटेडकडून दिलेला २० लाख रुपयांचा धनादेश अनादरित झाल्याने हे प्रकरण श्रीरामपूरच्या न्यायदंडाधिकारी (क्रमांक दोन) न्यायालयात दाखल आहे. साईकृपाचे तत्कालीन अध्यक्ष म्हणून आ. विक्रम पाचपुते आणि कारखान्याचे व्यवस्थापक यांच्यावर या प्रकरणात आरोपी म्हणून कारवाई सुरू आहे.
न्यायालयाने श्रीगोंदा पोलीस निरीक्षकांना स्पष्ट आदेश दिले आहेत की, दोन्ही आरोपींना ताब्यात घेऊन तातडीने न्यायालयासमोर हजर करावे. पकड वॉरंटमध्ये कोणतीही चूक किंवा हलगर्जीपणा खपवून घेतला जाणार नाही, असे स्पष्टपणे नमूद करण्यात आले आहे.
हिरडगाव येथील साईकृपा शुगर अँड अलाईड लिमिटेड हा कारखाना पूर्वी माजी आमदार बबनराव पाचपुते यांच्या कुटुंबाच्या मालकीचा होता. सध्या हा कारखाना गौरी शुगरचे अध्यक्ष बाबूराव बोत्रे पाटील यांच्या नियंत्रणाखाली आहे. तरीही, कारखान्याच्या जुन्या आर्थिक व्यवहारांमुळे पाचपुते कुटुंबाला कायदेशीर अडचणींचा सामना करावा लागत आहे.
धनादेश अनादर प्रकरणासारख्या घटनांमुळे साईकृपाच्या आर्थिक विश्वासार्हतेवर प्रश्नचिन्ह निर्माण झाले आहे. या प्रकरणात आ. विक्रम पाचपुते आणि कारखान्याच्या व्यवस्थापकाला पकड वॉरंट बजावण्यात आल्याने श्रीगोंदा आणि श्रीरामपूर परिसरात चर्चेला उधाण आले आहे.
