अहमदनगर Live24 टीम, 18 डिसेंबर 2021 :- एकीकडे पेट्रोल, डिझेल आणि एलपीजी सिलिंडरचे दर गगनाला भिडलेले असताना आता परवडणाऱ्या सीएनजी आणि घरगुती गॅस पाईपलाईनचे दरही वाढणार आहेत.
यामुळे सर्वसामान्यांच्या खिशाला आणखी झळ बसणार आहे. कॉम्प्रेस्ड नॅचरल गॅसच्या (सीएनजी) दरात किलोमागे दोन रुपयांची वाढ करण्यात आली आहे.
या वाढीमध्ये कराचा समावेश आहे. हे नवे दर शनिवारी सकाळपासून म्हणजेच 18 डिसेंबर पासून लागू झाले आहेत. सीएनजी व्यतिरिक्त एलपीजी पीएनजीच्या दरातही प्रति किलो दोन रुपयांनी वाढ करण्यात आली आहे. ही दरवाढ मुंबईत केली जाणार असल्याचे एमजीएलने सांगितले आहे.
यामुळे दर वाढविल्यानंतर सीएनजीचे नवे दर 63.50/Kg आणि पाइप नॅचरल गॅसची सुधारित किंमत 38 रुपये प्रति युनिटवर गेली आहे. ही दरवाढ झाली तरी देखील पेट्रोलशी तुलना केल्यास सीएनजी ग्राहकांचे 60 टक्के आणि डिझेलशी तुलना केल्यास 33 टक्के पैसे वाचणार असल्याचा दावा महानगर गॅसने केला आहे.
तसेच एलपीजी ग्राहकांपेक्षा पीएनजी ग्राहकांची 24 टक्के पैशांची बचत होणार असल्याचे एमजीएलने म्हटले आहे. मुंबईशिवाय लखनऊ, उन्नाव आणि आग्रा येथेही सीएनजी आणि पीएनजीच्या दरात वाढ करण्यात आली आहे.
गॅसच्या खरेदी दरात वाढ झाल्याने हा बदल करण्यात आल्याचे सांगण्यात येत आहे. दरवाढीनंतर लखनऊ, उन्नाव आणि आग्रा येथे सीएनजीची नवीन किंमत शनिवारी सकाळपासून 72.50 रुपये प्रति किलो झाली आहे.
अयोध्येत ते 72.95 रुपये/किलो असेल. आतापर्यंत सीएनजीची किंमत 70.50 रुपये प्रति किलो होती. लखनऊ आणि आग्रामध्ये, पीएनजीची किंमत प्रति मानक घनमीटर एक रुपये वाढून 38.50 रुपये प्रति मानक घनमीटर झाली आहे.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
