अहमदनगर Live24 टीम, 13 मार्च 2022 Ahmednagar News :- बेलापूर खुर्द येथे किरकोळ वादातून दोन कुटुंबात तुंबळ हाणामारी झाली. याप्रकरणी बेलापूर पोलिसांनी सहा जणाविरुध्द जिवे ठार मारण्याचा प्रयत्न केल्याचा गुन्हा दाखल केला आहे.
याबाबत अधिक माहिती अशी, बेलापूर खुर्द येथील बडधेवस्ती येथे राहणारे सुभाष मुरलीधर बडधे यांच्या शेजारील अजित मच्छिंद्र बडधे व इतरांनी त्यांच्या पत्र्याच्या शेडलगत गवत व पाचरट आणून टाकले व ते पेटविले.
त्यामुळे सुभाष बडधे यांच्या पत्र्याला आगीच्या झळा पोहोचल्या. त्याचा जाब विचारण्यासाठी सुभाष मुरलीधर बडधे, सुनिल सुभाष बडधे, पांडूरंग सुभाष बडधे, ज्योती सुनिल बडधे हे गेले असता अजित मच्छिंद्र बडधे, शरद मच्छिंद्र बडधे, ओमकार मच्छिंद्र बडधे, भाऊसाहेब कारभारी बडधे, सोनाली आजित बडधे, तुळसाबाई मच्छिंद्र बडधे यांनी लाठ्या-काठ्या गज व कुर्‍हाडीचा वापर करुन चौघांना गंभीर जखमी केले.
त्या चौघावर श्रीरामपुरातील खासगी रुग्णालयात उपचार सुरु असून एकाची प्रकृती गंभीर आहे. याप्रकरणी बेलापूर पोलिसांनी ज्योती सुनिल बडधे यांच्या फिर्यादीवरुन अजित बडधे, शरद बडधे, ओमकार बडधे, भाऊसाहेब बडधे, सोनाली बडधे, तुळसाबाई बडधे यांच्याविरुध्द गुन्हा दाखल केला आहे.
