अहमदनगर Live24 टीम, 12 एप्रिल 2022 Ambedkar Jayanti 2022 :- नुकतीच शहरात डॉ. बाबासाहेब आंबेडकर जयंती साजरी करणार्‍या मंडळासोबत पोलीस प्रशासनाची सुसंवाद बैठक झाली. 14 एप्रिल रोजी साजर्‍या होत असलेल्या डॉ. आंबेडकर जयंतीनिमित्त निघणार्‍या मिरवणुकीला रात्री 12 वाजेपर्यंत परवानगी देण्यात आली आहे.
बैठकीत आंबेडकर जयंती साजरी करणार्‍या मंडळांनी मिरवणुकीला रात्री 12 पर्यंत परवानगी द्यावी, मिरवणुकीच्या परवानग्या लवकरात लवकर मिळाव्यात, वाहतूक शाखेमार्फत वाहतुकीचे नियोजन करावे अशा विविध मागण्या पोलीस अधीक्षक मनोज पाटील यांच्याकडे केल्या.
अधीक्षक पाटील यांनी बहुतांश मागण्या मान्य करत डॉ. आंबेडकर जयंती शांततेत पार पाडण्याचे आवाहन मंडळांना केले. पोलीस अधीक्षक पाटील म्हणाले, डॉ. बाबासाहेब आंबेडकर जयंतीच्या मिरवणुकीला रात्री 12 पर्यंत परवानगी असेल.
जयंती साजरी करताना बाधा येणार नाही, यासाठी प्रयत्न करावेत. पोलिसांतर्फे मिरवणूक मार्गात अतिक्रमण असलेल्या दुकानधारकांना नोटीस बजावण्यात येतील. तसेच हा उत्सव शांततेत पार पडण्यासाठी समाजकंटकांवर प्रतिबंधात्मक कारवाई करण्यात येईल.
