Ahmadnagar Breaking : शेवगाव तालुक्यातील मळेगाव शे येथे एसटी बसच्या चाकाखाली सापडून एका ९ वर्षीय शाळकरी विद्यार्थ्यांचा दुर्दैवी मृत्यू झाला. हा अपघात मंगळवारी (दि.७) रोजी सकाळी पावणेदहाच्या सुमारास घडला.
मळेगाव येथील शेवगाव नगर रस्त्याच्या बाजूला राहणाऱ्या वनवे कुटुंबातील श्लोक गणेश वनवे (वय ९), हा घराकडून मळेगाव गावाकडे सायकलवर जात असताना म्हस्के यांच्या वीटभट्टी समोर श्लोक याच्यासमोरून रिक्षा जात होती,
रिक्षाला ओव्हरटेक करून पुढे जाण्याचा प्रयत्न करीत असताना अचानक समोरून राहुरीच्या दिशेने जाणाऱ्या (क्र. एम.एच. ४०- वाय – ५४२८), या शेवगाव -राहुरी बसच्या चालकाला अंदाज न आल्याने श्लोकची सायकल बसच्या पुढील चाकाला धडकून श्लोक फेकला जाऊन
तो बसच्या उजव्या बाजूच्या पाठीमागील चाकाखाली आल्याने जागीच ठार झाला. अपघतानंतर बसचा चालक पसार झाला. अपघातानंतर रस्त्यावर मोठा जमाव जमला होता.
या वेळी शेवगाव पोलीस स्टेशनचे सहाय्यक पोलीस निरीक्षक दीपक सरोदे यांनी घटनास्थळी भेट देत पंचनामा करून मृतदेह रुग्णवाहिकेतून उत्तरीय तपासणीसाठी शेवगाव ग्रामीण रुग्णालय पाठवून देण्यात आला. लोक हा मळेगाव येथील कर्डिलबा वस्ती येथील जिल्हा परिषद प्राथमिक शाळेत इयत्ता ३ रीमध्ये शिकत होता.
त्याचे वडील सोलापूर येथे पोलीस दलात कार्यरत आहेत. याबाबत शेवगाव आगाराचे चालक शहादेव लक्ष्मण गोरे रा. जोहरापुर ता. शेवगाव (वय ५१ ) यांच्याविरोधात गुन्हा दाखल करण्यात आला आहे. श्लोकच्या अपघाती निधनाने मळेगाव गावावर शोककळा पसरली आहे.
