Senior Citizen : देशातील ज्येष्ठ नागरिकांसाठी अनेक बँका एफडीवर भरघोस व्याज देत आहेत. भारतात, ज्येष्ठ नागरिकांसाठी मुदत ठेवींवर (FD) व्याजदर सामान्य नागरिकांपेक्षा जास्त आहे. विविध बँका उत्कृष्ट व्याजदर देऊन ग्राहकांना आकर्षित करण्याचा प्रयत्न करतात.
बँका ज्येष्ठ नागरिकांना FD वर सामान्यपेक्षा 0.50 टक्के जास्त व्याजदर देतात. अशातच काही बँकांनी फेब्रुवारी महिन्यात आपल्या एफडीवरील व्याजदरात वाढ केली आहे. कोणत्या आहेत त्या बँका चला पाहूया…
युनिटी स्मॉल फायनान्स बँक
छोट्या वित्त बँका सामान्यत: मोठ्या बँकांपेक्षा जास्त व्याजदर देतात. युनिटी स्मॉल फायनान्स बँकेत, ज्येष्ठ नागरिकांना 1,001 दिवसांच्या एफडीवर 9.50 टक्के व्याज मिळत आहे. बँकेने 2 फेब्रुवारी 2024 रोजी व्याजदर बदलले आहेत.
बँक सहा महिने ते 201 दिवसांपेक्षा जास्त कालावधीच्या FD वर ज्येष्ठ नागरिकांना 9.25 टक्के पर्यंत व्याजदर देते. तर वृद्धांना 501 दिवसांच्या एफडीवर 9.25 टक्के दराने व्याज देत आहे. युनिटी बँक 701 दिवसांच्या FD व्याजदरावर ज्येष्ठ नागरिकांना 9.45 टक्के व्याज दर देते आहे. इतर कोणतीही बँक सध्या एवढा व्याजदर देत नाही.
पंजाब आणि सिंध बँक
पंजाब अँड सिंध बँकेने 1 फेब्रुवारी रोजी आपले दर बदलले आहेत. पंजाब अँड सिंध बँक 444 दिवसांच्या FD वर 8.10 टक्के व्याजदर देत आहे. या विशेष एफडी ३१ मार्च २०२४ पर्यंत वैध आहेत.
करूर वैश्य बँक
करूर वैश्य बँक (KVB) ज्येष्ठ नागरिकांना त्यांच्या 444 दिवसांच्या FD वर जास्तीत जास्त 8.00 टक्के व्याजदर देते. हा दर 1 फेब्रुवारी 2024 पासून लागू होणार आहे.
पंजाब नॅशनल बँक
ज्येष्ठ नागरिकांना 400 दिवसांच्या FD वर जास्तीत जास्त 7.75 टक्के व्याज मिळू शकते. बँकेने 1 फेब्रुवारी 2024 रोजी एफडीचे दर बदलले. PNB ने सामान्य, ज्येष्ठ नागरिक तसेच अति ज्येष्ठ नागरिकांसाठी 300 दिवसांच्या FD दरांमध्ये 80 आधार अंकांची वाढ केली आहे. ही ठेव ज्येष्ठ नागरिकांसाठी ७.५५ टक्के आणि अत्यंत ज्येष्ठ नागरिकांसाठी ७.८५ टक्के दराने परताव्याची हमी देते.
