Ahmednagar Breaking : अहमदनगरमध्ये अपघातांची मालिका सुरूच असून बाह्यवळण रस्त्यावर अरणगाव परिसरात आज शनिवारी सकाळीच एक भीषण अपघात झाला. ट्रक-कटेंनर व स्विफ्ट हे तीन वाहने एकमेकांना धडकली. ही धडक इतकी भीषण होती की वाहनांचा समोरील भागाचा चक्काचूर झाला होता.
या अपघातामध्ये दोघांचा मृत्यू झाला असल्याची प्राथमिक माहिती समजली आहे. जखमींवर उपचार सुरु आहेत. एक जण गंभीर जखमी असून त्याच्यावर उपचार सुरु आहेत. अपघाताची माहिती समजताच ग्रामस्थांनी घटनास्थळी धाव घेत मदतकार्य सुरु केले होते. नगर तालुका पोलिसही घटनास्थळी आले होते.
शनिवारी सकाळी बाह्यवळण रस्त्यावर अरणगाव परिसरात ट्रक व कंटेनरची धडक झाली. त्याच वेळी पाठीमागून स्विफ्ट कार येऊन धडकली. हा अपघात इतका भीषण होता की यात दोघे मृत्युमुखी पडले. मागील हप्त्यात याच ठिकाणी दोन वाहनांचा अपघात होऊन त्यात दोघे जखमी झाल्याची घटना घडली होती.
त्यावेळी शिवसेनेचे उपजिल्हाप्रमुख संदेश कार्ले यांच्या नेतृत्वाखाली रास्तारोको आंदोलन करत साईड पट्या, सर्व्हिस रोड, दिशादर्शक फलक आदींबाबतच्या मागण्या करण्यात आल्या होत्या. आता पुन्हा एकदा याच भागात अपघात घडला आहे.
सध्या अपघातील मृतांची ओळख पटविण्याचे काम सुरू आहे. या मार्गावर दुतर्फा वाहनांच्या लांबपर्यंत रांगा लागलेल्या होत्या. सार्वजनिक बांधकाम विभाग व एनएचआयकडून अपघातग्रस्त वाहने बाजूला केली जात होती.
