Ahilyanagar Politics : विधानसभा निवडणुकीच्या पार्श्वभूमीवर सध्या महाराष्ट्रातील राजकीय वातावरण पूर्णपणे तापलेले आहे. नुकतीच विधानसभा निवडणुकीसाठी उमेदवारी अर्ज भरण्याची तारीख संपलीय.
यानंतर तर राज्यात राजकीय घडामोडींना मोठा वेग आला आहे. पण, उमेदवारी अर्ज भरण्याची तारीख संपल्यानंतर राज्यातील अनेक मतदारसंघांमधील लढती कशा असतील हे स्पष्ट झालं आहे.
अहिल्या नगर जिल्ह्यातही आता प्रमुख मतदारसंघांमध्ये लढती कशा असतील हे स्पष्ट झाले आहे. खरे तर राष्ट्रवादी काँग्रेस आणि शिवसेना या दोन पक्षांमध्ये फूट पडल्यानंतर पहिल्यांदाच विधानसभेच्या निवडणुका होत आहेत.
म्हणून या निवडणुकांकडे साऱ्यांचे लक्ष लागून आहे. यंदाच्या विधानसभा निवडणुकीत शिवसेना शिंदे गट, शिवसेना ठाकरे गट, राष्ट्रवादी काँग्रेस शरद पवार गट, राष्ट्रवादी काँग्रेस अजित पवार गट, भारतीय जनता पक्ष आणि काँग्रेस असे प्रमुख सहा पक्ष पहिल्यांदाच निवडणुकीच्या रिंगणात असतील.
यामुळे यंदाची महाराष्ट्रातील विधानसभा निवडणूक विशेष लक्षवेधी ठरत आहे. राज्यातील अनेक मतदारसंघांमध्ये अटीतटीच्या लढती होणार आहेत. शरद पवार गटविरुद्ध अजित पवार गट यांच्या उमेदवारांमध्ये होणाऱ्या लढती विशेष अटीतटीच्या राहणार आहेत.
महाविकास आघाडीमध्ये समाविष्ट असणाऱ्या शरद पवार गटाने 87 जागांवर आपले उमेदवार उतरवले आहेत तर दुसरीकडे महायुतीमध्ये समाविष्ट असणाऱ्या अजित पवार गटाने 52 जागांवर आपले उमेदवार दिलेले आहेत.
यापैकी महाराष्ट्रातील 35 जागांवर अजित पवार गटाचे भिडू शरद पवार गटाच्या भिडूला भिडणार आहेत. यामुळे या लढतीकडे साऱ्या राज्याचे लक्ष राहणार आहे. अहिल्या नगर जिल्ह्या बाबत बोलायचं झालं तर जिल्ह्यातील 4 विधानसभा मतदारसंघात अजित पवारांचे उमेदवार आणि शरद पवार गटाचे उमेदवार आपापसात भिडताना दिसतील.
महाराष्ट्रातील कोणत्या विधानसभा मतदारसंघात शरद पवार गटाचे आणि अजित पवार गटाचे उमेदवार आपापसात लढतील?
राज्यातील बारामती, इंदापूर, आंबेगाव, अहेरी, कागल, कळवा-मुंब्रा, हडपसर, वसमत, वडगाव शेरी, चिपळुण, शिरुर, तासगाव कवठे महांकाळ, इस्लामपूर, उदगीर, कोपरगाव, अणुशक्ती नगर, येवला, परळी, दिंडोरी, श्रीवर्धन, माजलगाव, वाई, सिन्नर, अहमदनगर शहर, अहमदपूर, शहापूर, पिंपरी, अकोले, जुन्नर, मोहोळ, देवळाली, चंदगड, तुमसर, पुसद, पारनेर या विधानसभा मतदारसंघात राष्ट्रवादीचे दोन्ही गट निवडणुकीत आमने-सामने राहणार आहेत.
अहिल्या नगर मधील कोपरगाव, अकोले, अहमदनगर शहर अन पारनेर या चार जागांवर राष्ट्रवादीचे दोन्ही गट आमने-सामने राहतील. यामुळे या लढतीकडे संपूर्ण जिल्ह्याचे लक्ष राहणार आहे.
