परिवहन मंत्री प्रताप सरनाईक यांनी एसटी महामंडळ दरवर्षी 5000 नवीन लालपरी बसेस खरेदी करण्याचा निर्णय घेतल्याची घोषणा केली. या खरेदीसाठी पंचवार्षिक योजना तयार करण्यात येईल. प्रवासी सेवेतून स्क्रॅप होणाऱ्या बसेसच्या जागी नवीन बसेसची भर घालण्यावर भर दिला जाणार आहे.
भाडेतत्त्वावर बसेस न घेण्याचा महत्त्वाचा निर्णय
महामंडळाने भविष्यात भाडेतत्त्वावर बसेस घेणार नाही, असा ठोस निर्णय बैठकीत घेण्यात आला. या बैठकीत महामंडळाचे उपाध्यक्ष व व्यवस्थापकीय संचालक डॉ. माधव कुसेकर आणि इतर वरिष्ठ अधिकारी उपस्थित होते.
इलेक्ट्रिक बसेस आणि चार्जिंग स्टेशन
महामंडळ प्रवाशांच्या सोयीसाठी इलेक्ट्रिक बसेस खरेदी करणार आहे. या बसेससाठी प्रत्येक आगारामध्ये चार्जिंग स्टेशन उभारले जाणार आहे, ज्यामुळे प्रवास अधिक आरामदायी आणि वेगवान होईल.
कर्मचाऱ्यांसाठी सुधारणा आणि निधी व्यवस्थापन
परिवहन मंत्री सरनाईक यांनी कर्मचाऱ्यांचे वेतन प्रत्येक महिन्याच्या 7 तारखेपर्यंत वेळेत दिले जावे, यासाठी विशेष प्रयत्न करण्याचे निर्देश दिले. तसेच, महामंडळाला शासनाकडून निधी आगाऊ स्वरूपात मिळवण्यासाठी प्रस्ताव तयार करण्याचे आदेशही त्यांनी दिले.
नवीन जाहिरात धोरणाची अंमलबजावणी
परिवहन मंत्री म्हणाले की, महामंडळासाठी नवे जाहिरात धोरण तयार करण्यात यावे. नवीन बसेसवर डिजिटल जाहिरातींसाठी जागा उपलब्ध करून महामंडळाचे उत्पन्न वाढवण्याचे उद्दिष्ट ठेवण्यात आले आहे. या धोरणातून 100 कोटींच्या उत्पन्नाचे लक्ष्य गाठण्याचा मानस आहे.
महामंडळाच्या उत्पन्नवाढीसाठी नवे उपाय
महामंडळाच्या डिझेल पंपांचा व्यावसायिक वापर करण्यासाठी नवे पर्याय तयार करण्याच्या सूचना दिल्या गेल्या. डिझेलवरील व्हॅटमध्ये सवलत मिळवण्यासाठी राज्य सरकारकडे प्रस्ताव पाठविण्यात येईल. तसेच, राष्ट्रीय महामार्गांवर महामंडळाच्या बसेसना टोल माफी मिळवण्यासाठी केंद्र सरकारकडे पाठपुरावा करण्यात येणार आहे.
