Post Office Investments 2025 : पोस्ट ऑफिसच्या रिकरिंग डिपॉझिट (RD) योजनेने अल्प बचतदारांसाठी मोठी संधी उपलब्ध करून दिली आहे. दररोज फक्त 100 रुपयांची बचत करून तुम्ही पाच वर्षांत 2,14,097 रुपयांचा परतावा मिळवू शकता. ही योजना सुरक्षित, विश्वासार्ह, आणि जोखमीविरहित असल्याने ती कमी उत्पन्न गटातील आणि स्थिर परताव्याची अपेक्षा असणाऱ्या गुंतवणूकदारांसाठी योग्य आहे.
कशी मिळेल 2,14,097 रुपयांची रक्कम?
या योजनेत गुंतवणूकदारांना महिन्याला किमान 100 रुपये गुंतवणूक करता येते, आणि व्याजाच्या स्वरूपात चांगला परतावा मिळतो. जर तुम्ही महिन्याला 3,000 रुपये गुंतवले, तर वार्षिक रक्कम 36,000 रुपये जमा होईल. पाच वर्षांनंतर एकूण गुंतवणूक रक्कम 1,80,000 रुपये असेल. सध्या या योजनेवर 6.7% वार्षिक व्याजदर लागू आहे. या दराने तुम्हाला 34,097 रुपयांचे व्याज मिळेल आणि मॅच्युरिटीवर एकूण रक्कम 2,14,097 रुपये होईल.
आरडी कशी सुरू कराल?
पोस्ट ऑफिस RD खाते उघडणे खूप सोपे आहे. किमान 100 रुपयांपासून सुरुवात करून तुम्ही हवे तेवढे पैसे या योजनेत गुंतवू शकता. खाते उघडण्यासाठी पोस्ट ऑफिसमध्ये जाऊन फॉर्म भरावा लागतो. याशिवाय, पोस्ट ऑफिसच्या अधिकृत वेबसाइटद्वारेही खाते उघडता येते. या योजनेत कोणतीही कमाल गुंतवणूक मर्यादा नाही, त्यामुळे जास्तीत जास्त रक्कम गुंतवून तुम्ही चांगला परतावा मिळवू शकता.
मुदतवाढ आणि फायदे
जर पाच वर्षांनंतरही तुम्हाला गुंतवणूक सुरू ठेवायची असेल, तर तुम्ही आरडीचा कालावधी पुढील पाच वर्षांसाठी वाढवू शकता. विस्तारित कालावधीत खाते उघडतानाचा व्याजदरच लागू होईल. उदाहरणार्थ, जर तुमचं खाते 6.7% व्याजदरावर उघडलं असेल, तर मुदतवाढीदरम्यानही तुम्हाला हाच दर लागू होईल. मात्र, जर तुम्ही मध्यंतरी खाते बंद केलं, तर उर्वरित रकमेवर पोस्ट ऑफिस सेव्हिंग अकाउंटप्रमाणे (सध्या 4%) व्याज लागू होईल.
मुदतपूर्व बंद करण्याची सुविधा
पोस्ट ऑफिस RD खाते तीन वर्षांनंतर, गरज पडल्यास, मुदतपूर्व बंद करता येऊ शकते. मात्र, जर तुम्ही पाच वर्षांपूर्वी खाते बंद केलं, तर तुम्हाला सेव्हिंग अकाउंटच्या व्याजदरानेच परतावा मिळेल. त्यामुळे गुंतवणुकीच्या कालावधीत खातं सुरू ठेवण्याचा सल्ला दिला जातो, ज्यामुळे तुम्हाला जास्तीत जास्त फायदा होईल.
पोस्ट ऑफिस RD योजना का निवडावी?
सुरक्षितता आणि हमी: पोस्ट ऑफिस योजनांवर सरकारची हमी असल्याने रक्कम पूर्णपणे सुरक्षित असते.
लवचिकता: कमी गुंतवणुकीत सुरू करता येणारी योजना, जी गरजेनुसार वाढवता किंवा कमी करू शकता.
गुंतवणूक सवय: नियमित बचत करणाऱ्यांसाठी ही योजना आदर्श आहे.
कर सवलत: या योजनेत गुंतवणूक करून कर सवलतीचाही लाभ मिळवता येतो.
आर्थिक नियोजनासाठी उत्तम पर्याय
पोस्ट ऑफिस RD योजना अशा लोकांसाठी सर्वोत्तम आहे, ज्यांना सुरक्षित गुंतवणूक हवी आहे आणि जोखीम टाळायची आहे. या योजनेतून दररोज फक्त 100 रुपये वाचवून चांगल्या रकमेची उभारणी करता येते. दीर्घकालीन आर्थिक उद्दिष्टांसाठी ही योजना तुमच्यासाठी फायदेशीर ठरू शकते.
